Сергей Меликовлул дунни республикалий коррупциялийн къарши буккаврил давуртту кувнницIун кув дакьаврил комиссиялул батIаву.
ЦIу буккан бувсса комиссиялул члентурал ва исполнител властьрал органнал каялувчитурал ххал бивгьунни 2021-ку шинал коррупциялул аьдлу-низам лиян даврийну хьусса зараллу бухлаган ва чан баврил масъалартту. Яла ххал диргьунни гьашину коррупциялущалсса талатаврил план.
«Коррупциялул ишру хIасул шайссар, мурадру бартбигьаврил къалмакъаллаву бакъассагу, пишакартал къуллугъирттай битаврил масъаларттавугу. ХIакьинусса кьини 7 уголов дело дачин дурну дур социал буруччаврил идарарттал каялувчитурал хIакъираву. Мукунмасса цаймигу мисаллу къачансса бур. ЦIанасса ппурттуву жунма чIалай бур официал ккаккиярттайн бувну, ялун личин дурсса коррупциялул ххуллий дурсса закон лиян давурттал зараллал лагрулул дуцин Дагъусттаннай хьуну дур ттуршвахъул миллионну къурушру», – кунни Меликовлул.
Махъсса шиннардий ихтиярду дуруччай органнал коррупциялущалсса талатаву ялу-ялун гужлан хъанай дачин дурну дур.Так ца дукIу сияхIрайн ларсун дур 750 коррупциялул ххуллийсса закон лиян даву, миннувух хIала-гьурттуну бур лаваймур даражалул каялувчиталгу. Ттуршвахъул инсантал кIункIу бувну бур уголов жаваблувшиврийн, азаруннаяр ливчусса къуллугъчитурал хIакъираву ишла бувну бур административ чаранну. Прокуратуралул ккаккиярттайн бувну, 400 млн къурушру зана дуван бувну бур бюджетравун.