Мартрал 16-нний Аьрасатнал Президентнал каялувшиврий видеоконференциялул низамрай хьунни регионнал социал-экономикалун кумаг баврил хIакъиравусса батIаву. Муний гьуртту хьунни Дагъусттаннал БакIчи Сергей Меликов.

Социал-экономикалун  ка-кумаграл хIакъираву

• Западраща къабювхъунни Аьрасатнайн къаршисса «экономикалул блицкриг» сакин дуван. Билаятрал экономикалуву дур цинярда луртанну, аьркинсса задачартту дузал бувансса каши.

•  ЦIанасса ппурттуву аьркинну дур дуван цаппара дахханашивуртту экономи­калуву,давуртту дакъа ливчIми гьарза къашаву ва инфляция ттинияр тихуннайгу хъунна къахъанахъаву мурадрай.
Властьрал мурад ми чан давур.

•  Аьрасатнаву хъун дуллалисар МРОТ, прожиточный минимум, бюджетниктурал харжру, соцвыплатартту ва пенсияртту.
Соцвыплатартту аьркинссар дуллан най дуна, кулпатирттаву дахханашивуртту хьусса чIумал.

•  ЦIанасса экономикалул захIматшивуртту духлаган давриву хъунмур кIану бугьан аьркин­ссар частный бизнесрал.

•  ЭкономикалуцIун дархIусса цIанасса захIматшивуртту бигьагу, куклугу хьун даншиврул хъунмур бияла бикIан аьркинссар частнайсса бизнесрахь. Жула ялун бигьлагьавурттансса сивсусса жавабну дикIан аьркинссар ишбажаранчитурахьхьун дуллусса бювхъуссаксса хъуннасса тархъаншиву, миннал инициативарттал чIарав бацIаву, ялув бавцIусса органнал, къуллугъирттал чан дан аьркинссар бизнесрахунсса дайшишру.

•  Губернатортурахьхьун ду­лунтIиссар ялун ххи дурсса ихтиярду инсантурангу, экономикалунгу оперативсса кумаг баву мурадрай.

Сергей Меликовлул бувсмунийну, Владимир Путиннул ихтилатраву бур агьалинан агьамшиву дусса кIанттурду. «Мискиншиврул даража ялавай баврил ва инсантурал социал къаархIалшиву духлаган даврил масъалартту гьашинугу агьам­ссаннун ккаллинува личIлай бур, жува ми бартбигьланну», – кунни Сергей Меликовлул. Дагъусттаннал БакIчинал бувсунни Аьра­сатнал Президентнал кIицI бувну бивкIшиву захIматрал яла чIивимур хIакь (МРОТ), бюджетниктурал зузалтрал харжру, социал выплатартту лахъ буллалишиву. «Жулла республикалун му хъиннува агьамссар», – кунни Республикалул каялувчинал.