«Маз миллатрал ххазинар». Укунсса цIанилу Ккурккуллал школалий хьунни Ниттил мазрал кьинилун хас дурсса мероприятие. Классрал чIирттайн лархъун дия лакку мазран хас дурсса стендру ва плакатру. Ккаккиялун дирхьуну дия хьхьичIазаманнул кьай-кьуй. ТIиртIуну дия лакрал чичултрал ва шаэртурал луттирдал выставка. ОьрчIругу, учительталгу бия миллатрал яннардаву.
Мероприятие дайдирхьуна лакрал гимнрайну. Мажлис тIитIлай, ихтилат бувна ванил сакиншинначи, оьрус мазрал ва литературалул учительница Гульнара Магьдиевал.
– Маз миллатрал ххазинар, багьа бищун къашайсса хъусри. Мазраву аьлтту хъанай бур халкьуннал тарих, жула Ватандалухсса ччаву, ужагърал гъилишиву. Маз халкьуннал аькьилшиврул ххазинар. Маз буруччаву – му жула буттал буттахъая шихуннай нанисса культура, аьдат-эбадатру дуруччавур. Маз буруччиншиврул жува муний гъалгъа тIун аьркинссару ичIувагу, кьатIувгу, шяравугу, шагьрулийгу. Цила чIумал миллатрал язисса арс, хIакьсса патриот Надиршагь Хачилаевлул увкуну бур: «Лаккучувнал лаккучувнахь лакку мазрай къаувкусса махъ – му щала жула миллатрайн къаршину кIура баллалисса махъри», – куну. Бачияра ябаннуча жула маз, – увкунни ванил.
Хъирив дуклаки оьрчIал бувккунни лакку мазрайсса шеърирду, увкунни балайрду, ккаккан дунни Дагъусттаннал халкьуннал къавтIавуртту.