Март зурул 2-нний Дагъусттаннал БакIчи Сергей Меликов ивунни Донбассрай аьрали бурж биттур буллалисса аьрали спецоперациялуву ивкIусса Аьрасатнал Аьралуннал хIаписар НурмахIаммад ХIажимахIаммадовлул кулпатращал кьурчIишиву кIидачIин.
Муния буслай бур Дагъусттан Республикалул БакIчинал сайт.

ДакIнийн бутанну, Ккуллал райондалул Къяннал шяравату­сса НурмахIаммад ХIажимахIам­мадовлул Донбассрайсса аьрали спецоперациялуву, жан хIайп къакуну, ххассал дурссар цала каялувшиндаралусса аьрали подразделениялул состав. НурмахIаммад ур ирсирай нанисса офицер.
Ванал ппу, виваллил ишир­ттал полковник Энгельс ХIажи­махIаммадовлулгу бивтссар къабигьасса ххуллу, мунияту хьуссар арснансса эбратну.
Республикалул БакIчинал, Энгельс МахIаммадовичлухь жижара буллай, чIа увкунни ссавур.
«Аьрасатнал Аьралуннал офицернал хьхьичI мурад бивхьукун, ганал га биттур бай­ссар. Ттул арс нал – Аьрали гужирдал офицернал, жан дуллу­ссар Ватандалул мурадру буручлай», – кутIану увкунни Энгельс ХIажимахIаммадовлул.
Сергей Меликовлул жижара бунни НурмахIаммадлул ниттихь Сапижат Мазаевахь ва офицернал щащарнихь, чIа увкунни захIматсса къюву духIансса ссавур ва чумартшиву.
«Ттун кIулссия цува Нурма­хIаммад. Га кунма виртталсса арам­тал жула дакIурдива къабу­ккантIиссар. Зух, ганал кулпатрах, дагьайсса къулагъас, ка-кумаг бикIантIиссар. Укунсса оьз­рурду къулагъас дакъа кьабитансса ихтияр жухь дакъассар. На дакIнийхтуну кIидачIлай ура зул кьурчIишиву, ацIантIиссара зул къювулул чIарав ва кабакьу бантIиссар НурмахIаммадлул аьпа абад бан», – увкунни Республикалул БакIчинал.
Чумартну ивкIусса Нурма­хIаммад, ниттил Сапижатлул кIицI лавгсса куццуй, мудангу хIарачатрай икIайва гьарзатраву хьхьичIунну икIан, цува уний цаятура хъинсса ва ххуйсса аьш кьаритан.
АцIния ххюра шинал оьрмулуву Рязаннал аьрали училищалийн дуклан увххун, ккаккан дурну дия дуккавриву ва спортраву хьхьичIуннайшивуртту. Сириянавусса дяъвилий хьун дурсса чувшивурттахлу лайкь хьуссар «Чувшиврул ордендалун».
НурмахIаммад ХIажима­хIаммадовлул кулпатрал барчаллагь увкунни Республикалул БакIчинахь дурсса къулагъасрахлу ва аякьалухлу.
КIицI бан багьлай бур, гьант­рал хьхьичI исполнител органнал каялувчитуращалсса батIаврий Сергей Меликовлул тапшур бувну бур виричувнал кулпатрал чIарав бацIан.
«Жува пахрулий буссару укунсса офицертурая – вай, ца Дагъусттаннал бакъа, щалагу билаятрал виртталли. ДакI дарцIуну ура ганал чувшиврун багьайсса кьимат бищунтIишиврий паччахIлугърал бакI дургьуминнал. Умуд бур яла лаваймур кьимат бищунссар тIисса. Украиннаву цала аьрали бурж биттур буллалисса офицертал ва солдат буручлай буссар Аьрасатнал мурадру.
Агарда хIакьину жува ми мурадру буручлай къабивкIссания, гьунттий бюхъайссия бала жула ужагъирттайн буххан», – увкунни Сергей Меликовлул.