Дагъусттаннал ХIуку­матрал хъунама, МухIу­ттиннул арс Аьбдулмуслим Аьбдулмуслимов М. Гусаевлул цIанийсса редакциярттал- издательствардал комплексрай хьунаавкьунни республикалул СМИ-лул каялувчитуращал ва журналистътуращал. Ванащал ия уттигъанну хъиривчувну ивтсса Ризван ГъазимахIаммадов ва Минимуществалул каялувчи Заур Эминов. Хьунабакьаврий гьаз бунни прессалул ва властьрал органнал дахIаврил хIакъиравусса, жагьилтурал дянив патриот асарду гужлан буллан аьркиншиврия­сса ва цаймигу агьамсса масъалартту.

Премьер-министрнал бувсунни ниттил мазурдил ва миллатрал прессалул масъаларттах цалла ххишаласса къулагъас дуллантIишиву, цувагу дакIцIуцIаву дуну ушиву ва цащава шаймур буллан дакIний ушиву.
– Агарда инсаннан ниттил маз къакIулну бухьурча, цала тухумрал, буттал шяраваллил тарих къакIулну бухьурча, цукун­сса патриотизм дикIанссар, ихтилат ссаяр бувантIисса? Да­гъусттаннал агьалинал цалва тарих, мархри, гьанурду буссар. Жунма жулла Ватандалия къалпсса информация ппив буллалаву кьамулну бикIан къааьркинссар. ЧIяру дувара укунмасса инсантураясса материаллу, чичлачияра производство ччаннай дацIан дуллалисса, агьалинан ччатI дузал буллалисса захIматкашная. Жунна ялун нанисса ник лайкьну тарбия дуван аьркинни, миннал тарбиялуву жуламур биялагу бикIан аьркинссар,– увкунни ванал.
Премьер-министрнал бувсунни Дагъусттаннал БакIчинал Издательствалул къатри цIу дуккан дувансса чарангу лякъинсса пикри бушиву.