«Чистая энергия» тIисса «РусГидро» ОАО-лул рахIму-цIимилул программалул лагрулуву дузрайн бувккунни компаниялул «ДЕТГИЗ» луттирду итабакьай идаралущал цачIусса ирглийсса проект. Дунияллийн бувккунни «Хочу все знать» тIисса оьрчIансса ва чIаважагьилтурансса цIусса альманах.
Зулайхат Тахакьаева
Ва цIанилусса цалчинсса альманах дунияллийн бувккун бур 1957 шинал. Гихунмай байбивхьуну бур элмулиясса, техникалиясса ва тIабиаьтраясса статьярду-хаварду бивщусса альманахру гьарца шинал итабакьлай, 1990 шинайн бияннин.
1964 шиная 1990 шинайн бияннинсса язи-язими статьярду ва ми темардайх ттизаманнул ябитаврийнусса статьярду цачIун бувсса цIусса альманахрал цалчинсса презентация хьуну дур ларгсса шинал ноябрь зурул 26-нний Москавлив хьусса дунияллул халкьуннал дянивсса луттирдал выставкалий. Луттирал тираж дусса дур 10 000 экземпляр. Му сакин бувну бур Сергей Ивановлул ва Александр Хохловлул. КIанттул библиотекарттайхчил ва школарттайхчил луттирду биян буллай бур «РусГидро» ОАО-лул филиаллу бусса регионнайн.
Ттигъанну Дагъусттаннал Миллатрал библиотекалуву Дагъусттанналмур филиалданулгу дунни луттирал презентация. Муний гьуртту хьунни МахIаммад ХIамзатовлул цIанийсса МахIачкъала шагьрулул гуманитар гимназиялул, Республикалул многопрофильный лицейрал, Каспийск шагьрулул ОьрчIал технический творчествалул центрданул дуклаки оьрчIру. Луттирая оьрчIахь бувсунни Каспийск шагьрулул библиотекалул хъунаманал хъиривчу Галина Иранпурдул. АрхIалва чIава буккултрал хьхьичIун лавсунни вава куццуй «РусГидро» ОАО-лул ка-кумаграцIух «ДЕТГИЗ»-рал итабавкьусса, оьрчIал шаэр Анастасия Орловал «Речка, речка, где твой дом» тIисса, Аьрасатнавуцири неххардия бусласисса шеърирдал лугу.
Дагъусттаннал филиалданул альманах ва шеърирдал лу булун тIий бур шагьрурдал ва районнал библиотекарттан.
Гихунмай «Открывашка» тIисса элмийсса шоулувасса аьлимчу Открывашкиннул оьрчIащал дуруна викторина. ХьхьичIунсса гьурттушинна дуллалисса оьрчIан пишкаш бувна луттирду. Ялагу аьлимчу Открывашкиннул оьрчIан ккаккан бувуна физикалул ва химиялул опытру, экспериментру. Утти вайннан кIул хьуссар марххала биял къахъанахъийни олимпиадарттайн ххияйсса искусственныйсса марххала ссая ва цукун байссарив ва чIявусса цаймигу физикалул элмулул кьюлтIшивурттая.
