Щаллагу дунияллийсса бизнес-школардаву ца яла хьхьичIунмунин хIисавссар Ломоносовлул цIанийсса МГУ-рал Высшая Школа Бизнеса (ВШБ) тIисса факультет. 2014 шинал дунияллийцири яла хьхьичIунми 100 вузравух ва Европанавусса яла хьхьичIунми 40 вузравух бия му кIицI лавгсса факультетгу. Дуклан буххангу, гьай-гьай, къабигьассар му факультетрайн.
КIилчинмур курсирай микку марцIну ингилис мазрай дишайсса дур дарсру, лекциярду ккалай бусса бур кьатIаллил билаятирттаясса профессортал. Цивппа студентъталгу стажировкалий кьатIаллил билаятирттал хьхьичIунми вузирдавун тIайла буккайсса бур. Му факультетрайн дуклан увхсса ЧукIуннал шяравасса Нажмуттиннул арс Оьмаров Тахи уттива, цалчинмур курсирайва, лайкь хьуну ур факультетрал деканатрал барчаллагьран.
П. Рамазанова
Тахил марцIну ххювардай къуртал бувссия МахIачкъалаллал №39 лицей. Школалийва дуккавриву итххявхсса Тахи республикалул лагрулийсса олимпиадарттай, конференциярттай гьуртту хьуну, хьхьичIунсса кIанттурду бувгьуссия. Школданийва айивхьуссар Москавливсса ца яла хьхьичIунмур вузрачIансса ххуллу гъан буллайгу. Масалдаран, ларгсса шинал 24-28-мур мартрай Москавлив хьуссия элмулуха зузисса Аьрасатнал жагьилтурал форум «Шаг в будущее». Микку Тахи Оьмаровлул «Финансовая пирамида в век информационных технологий» тIисса доклад бувну, му докладрая цIарду дурну дур аьрасатнал аьлимтурал, экономистътурал. №39 лицейраву 11-мур классраву дуклакисса Тахи му конференциялул лауреатнал дипломращал зана хьуссия Москавлия. Дипломрай «за высокое качество научных результатов» тIий бур. Школ-оьрчIал хъуннасса хьхьичIуннайшивур укун лахъсса кьиматращалсса диплом! Ми дипломру тIурча Тахил цагу, кIивагу бакъар. Национальный исследовательский институтрал, «Высшая школа экономикалул» факультетрал конференциялий бувсса докладрахлугу лайкь хьуну ур мукунмасса дипломран.
КьатIаллил билаятирттаясса студентътал ва дуклаки оьрчIру гьуртту хьусса «Эрудиты планеты – 2014» дунияллул халкьуннал олимпиадалий хьхьичIунсса гьурттушинна дурнугу дипломращал зана хьуну ур.
«Му олимпиадалий Эстониянавасса, Белоруссиянавасса, Къазахъисттаннаясса дуклаки оьрчIру ва студентътал бия, таманссаннащал кIул хьуссияв, жулва Дагъусттаннайсса оьрчIру кунма цалла кIулшивуртту куртIгу, цIакьгу дуллан чялиш бувксса оьрчIру бия», — тIий ур Тахи. Дагъусттаннал Минобразованиялул цIаниятусса дипломру ва ХIурматрал грамотардугу чансса дакъар Тахил ххувшавурттал ххуржинттаву. Мунайн МахIачкъала шагьрулул мэрнал цачIанма оьвкуну бивкIун бур дуккаврил гьунар бусса оьрчIащал архIал.
Тахи так дуккавриву хьхьичIунма акъар. Му ур Аьрасатнал чемпионгу, цимилагу соревнованиярттай ххув хьуну дагъусттаннал чIава чемпионнал цIа лайкьну дурурччусса.
МГУ-раву «Высшая школа бизнеса» факультетрай 1-мур курсирай дуклакисса Тахин 17 шин дур. Му ур курсирай архIал дуклакиминнаву яла чIавама. Дуккаврил хIасиллах бурувгуннив му чIавама ушиву щуркIалвагу хъанай бакъар тIий ур я цанма, я преподавательтуран.
«Циняв бия ца зумату кунма му яла захIматмур факультетрайн циван дуклан най ура, му москвичтуран битича, цамур факультет язи бугьи тIий. Нагу ивкIра, «циванни на захIматшивурттая нигьаусан аьркинсса, москвичтураща лахьхьин шаймур циванни ттуща лахьхьин къашайсса» тIий. ЗахIмат буний ялунгума гъира ххишала шайхха, нагу гъирарай дуклай ура, ттун кIула нава цукунсса, ци факультетрайн дуклан най уссарав», — тIий ур Тахи. Гьай-гьай, дуккаврил гьану цIакьсса бухьурча, захIматнугу, гъира бикIантIиссар дуклан ччинан. МарцIну ххювардай ЕГЭ-рду дуллусса Тахи Оьмаровгу цалла кIулшивурттайхчIин, аькьлулийхчIин ххуллу лавсун нанисса жагьил ур.
Нагу дакI дарцIуну бура мунал ххуллу ххуйсса дипломрачIансса ва хъинсса касмулучIансса бушиврий.
ТIайлабацIу баннав вин, Тахий, дуккавривугу, гьар дуллалимунивугу!
