Парижлив хьусса ишир­ттая буслайнма, гъалгъа тIийнна дур дунияллийцири СМИ-рду. Агьалинал зумувсса темагу цIана хъунмурчIин му дур.

П. Рамазанова
Роскомнадзорданул (Российская федеральная служба по надзору в сфере связи, информационных технологий и массовых коммуникаций) баян бунни франциянал«Шарли Эбдо» журналданийсса Идавсил (с.аь.с.) карикатурардайн къадагъа дуллалишиву, му журналданул мужаллатрайсса карикатуралул перепечатка личIи-личIисса диннал ва миллатирттал агьалинал дянив душманшиву дагьаву мурадрайсса даву хъанахъишиву.

Январь зурул 19-нний Грозный шагьрулий хьунни чIявусса агьали цачIун бавтIсса митинг – Идавсил (с.аь.с.) карикатурарду дувулт­райн къарязийсса демонстрация. ТIайланнасса эфирданий му митинг «Россия 24» телеканалданул кка­ккан дунни.
Бувсунни Грозный шагьрулул дязаннив бувкшиву миллион инсантурал.
Чачаннал бакIчи Рамзан Кьадировлул увкунни: «Карикатурарду дуллалими ва ми оьрмурдацIа бувми дащуй бишин кIанттай, Франциянал властирдал цIу ягин дуллалисса шоу дунни. Микку гьуртту хьунни президентътал, премьертал ва паччахIтал».
РПЦ-лул (Православная церковь России) иерархналгу баян бунни Грозныйливсса митинграйн бавтIцириннал тIалавшиннардацIун бакьлай бушиву цивппагу.
Грозныйливсса митинграй гьуртту хьунни Аьрасатнал бусурманнал рувхIаний управлениялул председатель ва Аьра­сатнал муфтиятрал Советрал муфтий, щайх Равиль Гайнуттингу.
«Жу цумурцагу диндалул агьалинал асарду кьюкьин буллалиминнал муттаэталлу, циняв диннал ва культуралул хIурмат буну къуццу тIутIаву тIалав буллалиссару», — увкунни щайхнал.
Митинграй гьурттушинна дунни дагъусттаннал делегациялулгу. Январь зурул 23-нний МахIачкъалалив дувантIишиву баян барчагу мувва мурадрайсса мавлид, чIявусса инсантал лавгунни Грозныйливгу.
Шиккува кIицI лаганна, бусурманнал чул бувгьуну бушиву чIявусса сийлийсса политиктал ва аьлимталгу. Цивппа бусурман бакъанугу.
Аьрасатнал машгьурсса политикнал, экс-премьер-министр Евгений Примаковлулгу баян бунни цанмагу оьлу бивзшиву Идавсил (с.аь.с.) карикатура дуваву.
«Печатьрал тархъаншиву аьркинссар, амма му тархъаншиву инсантурал динийсса асарду кьюкьин буллалисса дикIан къааьркинссар, Идавсил (с.аь.с.) карикатурарду дуваву – му бусурман кьюкьин банну, гьалак буккан буванну тIисса давур», — увкунни академик Примаковлул.
Амма букъавчIлачIисса ишир­ттал ва къалмакъаллал ахир къадикIансса хханссар: Франциянаву бувгьуну бусса бур теракт хIадур дурсса бандитъталли тIий 4 чачан. ЦIубутIуй баян бувна 5 россиянин увгьушиву, яла мяйжан бунни миннавату 4 инсан чачан ушиву, ца – Австриянал гражданин. СМИ-рдал ва экспертътурал баян бунни Грозныйлив митинг даврихлу Франциянал Рамзан Кьадировлуя кьисас ласласисса давур куну. «Франциянал прокуратуралул ва властирдал баян бунни террористътал бугьарду куну, амма миннал цIарду, фамилиярду кIицI къаларгунни, аьщуйн щуну цичIав къабувсунни», — увкунни Рамзан Кьадировлул пресс-секретарь Альви Каримовлул.