Декабрьданул 1-нний Дагъусттаннал БакIчи Сергей Меликовлул дунни республикалий аьмсса дуккаврил аралул паччахIлугърал политика бартдигьаврил масъаларттал хIакъиравусса батIаву. Муний гьуртту хьунни АьФ-лул просвещениялул министрнал хъиривчу Анастасия Зырянова, мува министерствалул ПаччахIлугърал политикалул ва управлениялул департаментрал директор Максим Костенко ва цаймигу.
БатIаврий махъ лахълай, Сергей Меликовлул кунни: «ХIакьину дуккаву жучIара цалчинмур кIанттай дуссар, ва му аралуву кьамул буллалисса хIукмурду кIулну бикIан аьркинссар циняв даражардал къуллугъирттал каялувчитуран».
Анастасия Зыряновал тIимунийну, Дагъусттаннан аьркинну бур 2023 шинал сентябрьданул 1-ннийнин духлаган дуван школардай шанна чIумух дарсру дишаврил низам. Мукунма аьркинну бур гьануцIакул бакьин буван чIявусса школартту. Дуккаврил системалун кьимат бишлан тIий бур цаппара ккаккияртту гьануну ларсун: байбихьулул школалий дарс ххуйну дуккаву – му ккаккиялийну жула билаятрал бугьлай бур дунияллий цалчинмур кIану. КIилчинмур ккаккия – математика ва естествен.элмурду 4-8 классирттаву хъинну кIулшиву – миккугу жула билаят бухлай бур хьхьичIунсса 10 билаятравун. Шамилчинмур ккаккия дур 15 шинавусса дуклаки оьрчIаща школалий ларсъсса кIулшивуртту иширайну ишла дуван бюхъаву. Микку жулва оьрчIру махъун багьлай бур.
Анастасия Зыряновал сукку бунни мукунма байбихьулул ва аьмсса дуккаврил стандартру цIудуккан даврил ва цаймигу масъалартту.
Максим Костенкол бувсунни федерал законодательствалуву хьусса цIушиннардая.
ДР-лул ХIукуматрал Председательнал хъиривчу Манвел Мажонцлул бувсунни цIусса дуккаврил объектру бавриву, бакьин бавриву ва ми тIитIавриву хъанахъисса захIматшивурттая.
Дагъусттаннал БакIчинал республикалул муниципал сакиншиннардал бакIчитурайн тапшур бунни хIакьину яла захIматминнун ккаллисса масъаларттах къулагъас ххи дуван.
