ДР-лул Халкьуннал Мажлисрал депутатътурал 5-мур сессиялий кабавкьунни жяматийсса кIанттурдай QR-кодру щурущи буллан аьркиншиврул хIакъиравусса закондалул проектрацIун. Проектращал депутатътал кIул бунни ЦIуллушиву дуруччаврил, захIматрал ва социал политикалул комитетрал председательнал хъиривчу Илияс Маммаевлул. Мунал тIимунийну, му системалийну инсантураща бюхълай бур занан чIявусса халкь салкьи хьусса кIанттурдайн, кодру бакъаминнаща бюхълай бур занан так дукиялул ттучаннавун ва аьпттикIирттавун. Закондалул проект кьамул дунни чIявуми чIурду буллуну.
Сессиялий цалчин дурккуну кьамул дунни 2022-ку шинайнсса Дагъусттаннал бюджетрал хIакъиравусса закондалул проект.
Проектращал депутатътал кIул бунни ДР-лул финансирттал министрнал кIанайма Аьли Исмяиловлул. Му документрайну Республикалул бюджетрал аьмсса доходирттал лагру хьунтIий дур 158,4 млрд къурушру, миннувух дур федерал бюджетравату дучIайсса межбюджет трансфертругу – 115,3 млрд къурушру. Харжлугъру хьунтIий дур 172,6 млрд къурушру. Республикалул бюджетравун диял хъанай дакъар 14,1 млрд къурушру.ЧIяруми доходру дучIайссар налогирттайну (прогноз – 41,6 млрд къурушру).
Депутатътурал кабакьу бунни закондалул проектрацIун цалчин дурккуну, чIявуми чIурду буллуну.
