Ноябрьданул 24-нний Сергей Меликовлул каялувшиврий ДР-лул ХIукуматрал Ххуллурдай мюхчаншиву дуруччаврил комиссиялул батIаврий ххал бивгьунни бала-апатIсса ишру шаврицIун бавхIусса масъалартту.
Дагъусттаннал БакIчинал тIимунийну, гьашинусса шинал 10 зуруй аварияртту шаврил ккаккияртту чан-кьансса яларай дагьарчагу, иш-тагьар личIину даххана хьуну дакъар, инсантал литIлайнма бур ххуллурдал апатIирттаву. Гьашинусса 10 зурул мутталий сияхIрайн лавсун бур 1145 ххуллул апатIсса иш, миннуву ливтIуну ур 247 инсан ва цIунцIияртту хьуну дур 1606 инсаннан.
Сергей Меликовлул кIицI бунни ххуллурдал кьяйдарду лиян даврил профилактикану хъанахъишиву тахсирлувтал танмихIрая ххассал хьун къабитаву. Мунияту циняв идарартту зун аьркинссар кувннищал кув бавкьуну – УГИБДД, силистталул органну, судрал система, исполнител властьрал органну, судирттал приставтурал къуллугъру.
«Республикалул ххуллурдай аварияртту чан хьуншиврул аьркинссар автошколарттай хъинну хIадур буллан шофертал. Ххуллурду бакьин буван, ххуллурдай аьркинсса лишанну дузал дуван», – кунни Республикалул каялувчинал.
Республикалул ххуллурдай апатIсса ишру шаврил тагьардания ва ми хьун къабитансса чаранная гьартану бувсунни ДР-лул ГИБДД-лул Управлениялул хъунама Александр Шалыгиннул. Мунал тIимунийну, гьашину республикалий ашкара дурну дур машинарттал сайки 2 млн ххуллурдал кьяйдарду лиян давуртту, ва 48 азарда – бахьтта заназиминнал чулуха.
Судирттайн тIайла дурккун дур 24,5 азарда материал административ аькIри цила чIумал къалахъаву сававну. Яла чIяруми аварияртту хъанай дур федерал ххуллурдай – миннуй хьуну бур 390 апатIсса иш, ливтIуну ур 125 инсан, цIунцIияртту хьуну дур 610 инсаннан.
Шалыгиннул бувсунни бувччу хьуну машинартту бачин буллалиминнал хIакъираву. Мунал тIимунийну, медициналул идаралийн бувччу шаву тасттикь буван бувцуминнавату анжагъ 70 инсан лявкъуну ур наркотикру ишла бувсса.
Александр Шалыгиннул бувсунни мукунма ххуллурдай апатIру чан хьуншиврул дуллалисса давурттал хIакъиравугу.
