ДР-лул ТIабиаьтрал ва жагьилтурал иширттал министерстварттал кабакьаврийну ларгсса нюжмардий МахIачкъалаллал зума-къирагърай Каспи хьхьирил зуманицI хьунни «Экология» нацпроектравун багьлагьисса щинал ляличIисса объектру ябаврил цIаний щурущисса федерал проектрал лагрулий дуллалисса щалагу Аьрасатнал экологиялул акция «Вода России» тIисса акциялул агьаммур мероприятие.
Акция мяйлчин дуллай бур Аьрасатнал тIабиаьтрал министерствалул сакиншиндарайну.
Муний гьуртту хьунни Дагъусттаннал лавайми ва дянивми дуккаврил идарарттал студентътал, волонтертурал ккураннал вакилтал ва тIабиаьт дуруччаврил цIаний дакI цIуцIисса агьали. Вайннал кумаграйну хьхьирил зуманицIа дартIунни ччюрк.
ДР-лул тIабиаьтрал сурсатирттал ва экологиялул министрнал буржру биттур буллалисса Марина Аьлихановал барчаллагь увкунни акциялул сиптачитурахь ва муний гьурттушинна дуллалиминнахь.
Жагьилтурал иширттал министр Камил Саидовлул кIицI лавгсса куццуй, Дагъусттаннал жагьилтал мудангу хъунмасса гъирарай гьуртту шай республикалий буллалисса цинявппагу экологиялул акциярттай.
«Жула жагьилтал вардишссар хъинсса ва мюнпатсса акциярттай гьуртту хъанан. Куннал кув бувгьуну ва чялишну гьуртту шай республикалул шагьрурдай ва районнай хъанахъисса акциярттайгу.
На барчаллагьрай ура ва иширал чIарах къабувкминнайн ва оьвтIий ура Каспи хьхьирил зума хъиннура марцI дуван», — увкунни министрнал.
Аьрасатнал Минприродылул щинал хозяйство хьхьичIуннай даврил центрданул директор Илья Разбашлул баян бунни шинал лажиндарай щала Аьрасатнаву «Экология» нацпроектрал лагрулий бувну бушиву 15 азарва экологиялул акция.
«Зущал архIал «Вода России» акциялул командалувун бухлай бур миллиондалуха ливчусса инсантал. Ва Аьрасатнал Минприродылул хъунмасса тIайлабацIур.
Жу барчаллагьрай буру зуйн – ватандалий дакI цIуцIисса инсантурайн. Ва хIакьину жува цачIун хьуну хъиннува марцI банну жула аьмсса ужагъ», – увкунни Разбашлул.
Машгьурсса актриса, «Вода России» акция хьхьичIунмай бачин буллалисса Юлия Михалкова, оьвтIий бур акциялий гьуртту хъанахъиминнайн, мероприятиялиясса суратру социал сетирдаву дишин. «Бачияра цинявннан ккаккан баннуча цукун ххирану дикIан аьркинссарив тIабиаьт», – увкунни ванил.
ЛичIи-личIисса экологиялул акциярттай чялишсса гьурттушинна дурминнан сакиншинначитурал чулуха дуллунни наградартту.