На Лаккуяту МахIач­къа­лалив ивзни, ттун кьисмат хьуна чIаххуврайсса кIия полковникнащал кIул хьун: цалчинма ур Авгъанисттаннай 2 шинай жула посольствалий советникну зий ивкIсса Аьвдуссаламов Патяли, Кудалилиятусса яручув, кIилчинма — Чернобыллал атомный электростанция пIякь кусса чIумал бувсса захIматрахлу Виричунал цIанин лайкь хьусса Исмяилов Нисрет Сайпуллагьлул арс, лазгиричу. Лакку оьрчIащал службалий бивкIун бур. Мунияту ххирар кIиннанмагу жула халкьгу, ла­кку оьрчIругу.
На вайннаяту хьхьичIвагу чивчуссия.
ЦIанамур ттул ихтилат кIилчинманаятур, яни Исмяилов Нисретлуя.
Полковник Н.С. Исмяилов увну ур 1957-ку шинал, бюхттулсса зунттавусса Фий тIисса шяраву, Ахттиял райондалий.
ОьрчIнийва чIявусса оьрчIру бусса къатлуву хъуна хьусса (9 оьрчI-бакI) ва захIматрал сасан увсса оьрчIал 1976-ку шинал къуртал бувну бур дянивмур даражалул школа Дагъусттаннал Огнилий. Миккува профтехучилищагу бувккуну, хьуну ур пюрунтру байсса мастер. 1981-ку шинал къуртал бувну бур Кострома шагьрулийсса Высшее военное командное училище. 1994-ку шинал бувккуну бур Москавлив С. К. Тимошенкол цIанийсса аьраяллил академия. Къуллугъ буллай ивкIун ур Дянивмур Азиянаву (Самарканд, Чимкент, Ашхабад), Москавлив, Забайкаллал округрай, Монголиянаву, Украиннай, Ухссавнил Къапкъазуллал округрай.
Цала пишалий зий, чIявусса халкь нигьачIисса иширттава ххассал бувсса инсан хъанай ур ва. Чернобыллал атомрал станция пIякь куний, ва даврил пишакар ухьувкун, литIаврища бурувччуну бур чIявусса солдат ва кIанттул халкь. Му ишираву хIукуматрал ванан «Герой Чернобыля» тIисса Виричунал цIа дуллуну дур. 1999-ку шинал тIурча, Дагъусттаннал аьрщарайн террористал ххявхнийгу, цала бувсса захIматрахлу Нисрет лайкь хьуну ур кIилчин Виричунал ЦIукун – «Дагъусттаннал халкьуннал Виричу» тIисса цIанин.
Нисрет Исмяилов пенсиялий игьалаглай ухьурчангу, ца гьантта оьнмасса буллай акъар. Ва ур хъунасса общественник. Ванайн оьвчай жагьилтал армиялийн нанийнигу, школарттай дуклакиминнащал хьунаакьингу, личIи-личIисса батIавурттайнгу. Нисрет ур цала службалия, бакIрачIан бувкIмуния мемуарду чивчу­сса шаэргу, 4-5 луттирал авторгу. Дагъусттаннай дяъви къуртал хьуну махъгу, ЦIуссалакрал аьрщарайсса пIякь къаувкусса бомбарду, гранатартту духлаган дуллай, миннуцIа аьрщи марцI дуллай, хъунмасса захIмат бувссар Нисретлул.
Ца чIивисса эпизодгу дакIнийн бутан бучIир. Ккуллал райондалийсса радиациялул фон ххал дуллалисса кIанай, дезиметралул стрелкалущал Ккуллал шяравух нанийни, га гьалак дурккун дур: ххал дарча, шяраву цаппара чIаркIнил, ппалнил магъай бивхьусса ганзсса муххал турбарду радиация дусса лявкъуну бивкIун бур. Ми бухлаган бансса чаранну ккавкссар Нисретлул (ми бивкIун бур газ буклакийни ишла байсса, лухччинува радиациялущал бувксса турбарду, арандалия лавсун бувкIсса).
Барча хьуннав, Нисрет, вил кIивагу Виричунал ЦIуку.

ХIусайн Давыдов