Октябрьданул 4-нний коронавирусрал хIакъиравусса батIаврий ДР-лул БакIчи Сергей Меликовлул вичIи дирхьунни гьавалул тагьар даххана шаврицIун МахIачкъалалив хьусса хIалкьазиялул информациялух ва ХIукуматрайн тапшур бунни шагьрулий анаварну бартбигьин аьркинсса масъалартту ккаккан буван.
МахIачкъалаллал администрациялул ккаккиярттайн бувну, шагьрулий зий бур 16 мобил бригада, миннал марцI дуллай бур гъарал щин экьи лагайсса стокру цIинцIацIа,17 кIанай дузал буллай бур электросетирдал авария хьусса кIанттурду.Чулийн буккан бувну бур «Пальмира» микрорайондалийсса насосрал станция бакьин баврил масъалагу.
Щинахьхьун лавгун бур МахIачкъалаллал подстанция «Приморская», мунил бартдигьлагьиссар «Редукторный» ва «Турали» поселокирттал аьркиншин. ДР-лул энергетикалул ва ЖКХ-лул министр Ризван Мурадовлул бувсунни республикалий гужсса гъараллу лачIаврил биян бувсса зараллая.
Масъалалул хIакъираву ихтилат бунни мукунма ДР-лул ГУ МЧС-рал каялувчи Нариман КазимахIаммадовлулгу.
Республикалул каялувчинал барчаллагь кунни Дагъусттаннал МЧС-рахь ва ххассал бувултрахь миннал дуллалисса давурттахлу.
«Прогнозрайн бувну, бюхъайссар ттигу гужсса гъараллу лачIлан вай гьантрай щала Дагъусттаннай. Гъарал щинал лиян дуллай дур региондалул коммуникациярттал зузаву. Мунийн бувну, республикалул ХIукуматрахь тавакъю буллай ура, аьркинсса циняв республикалул идарарттайнгу оьвкусса батIаву дурну, ляличIисса тагьарданул хьхьичIалу кьуьинсса давуртту бартдигьин хIадурну бикIан»,- кунни Сергей меликовлул.
Оператив штабрал батIаврий
![](https://ilchi.info/wp-content/uploads/sites/11/sites/11/2021/10/kop_oper_shtab.jpg)