Сентябрь зурул 28-нния октябрь зурул 5-ннийнин МахIачкъалалив хьунни II Дунияллул миллатирттал театрдал фестиваль.

Фестиваль сакин дурну дия ДР-лул Культуралул министерствалул М. Горькийл цIанийсса Оьрусналдрамалул театрданущал цачIуну, Дагъус­ттан Республикалул ХIукуматрал кабакьаврийну.
Фестивальданий гьуртту хьу­нни Дагъусттаннаясса, Ингушнавасса, Чачаннавасса, Ух­ссавнил АсатIиннавасса, Кьиблалул АсатIиннавасса, Къарачай-Чаргаснавасса, Татарстанная­сса, Мордовиянавасса, Башкортостаннаясса ва Абхазнавасса миллатирттал театрду.

Спектакллу ккаккан бунни МахIачкъалалив Оьруснал ва Къумукьнал, Дарбантлив Лазгиял театрдал сахIнардай.
Цинявппагу спектакллу бивхьунни синхрон журалий таржума буллай.
Нюжмардул дянив дагъус­ттаннал тамашачитурал ххал бунни, нажагьсса ттизаманнул пьесарду бакъасса, сайки щалагу дунияллул классика.
14 — 22 шинал оьрмулувусса инсантураща фестивальданий ккаккан буллалисса ччимур спектакль ххал бан бюхълай бия «Пушкинская карта» программалийхчил уква.
Фестивальданул лагрулий Оьруснал театрдануву хьунни культуралул министр Зарема Буттаевал фестивальданул сакиншинначитуращалсса ва жюрилул члентуращалсса хьунабакьаву.
Театрал критик, искусствоведениялул кандидат, социокультурардал экспертизарттал центрданул эксперт Елена Покорская, Аьрасатнал лайкь хьусса артист Валерий Подгородинский, Аьрасатнал магьирлугърал лайкь хьусса ишккакку Скандарбек Тулпаров ва ДР-лул магьирлугърал лайкь хьусса зузала Зумруд Аьлиева кIицI лаглай бия фестивальданун яргсса цIа дулун багьлай бушиву.
Фестивальданул даражалул ялув вайннал кIицI лавгунни хьхьчIимунияр ларай хьушиву.
«Спектакллал даража ва базилух лавайсса бур. Мунил бусласи­ссар проект хьхьичIунмай хъана­хъаврия», — увкунни Покорскаял.
Проект хьхьичIунмай баврил ялув маслихIат бунни конкурсрайн итабакьлан так махъсса шинал бивхьусса спектакллу. Пикри бунни конкурсрайнсса постановкардал темардугу язи дугьлан.
КIицI лавгунни ттизаманнул миллатрал драматургиялийн багьайсса, жагьилсса актёртуран ва режиссёртуран кабакьу бан аьркиншивриясса суаллу.
Фестивальданул сакиншинначитурахь ва экспертътурахь барчаллагь тIий, Зарема Буттаевал кIицI лавгунни ва проектран гихунмайгу республикалул каялувчитурал багьайсса кумаг буллан тIий бушиву.
Дунияллул миллатирттал II фестивальданул хIасиллая ва ялун бучIантIимуния ихтилат бия Р. ХIамзатовлул цIанийсса Национал библиотекалуву хьусса пресс-конференциялийгу.
Агьаммур буруккинну экспертътал кIицI лаглай бия, фестивальданий ккаккан бувцири спектакллайн бувну, цал уттигу асар хьушиву миллатирттал драматургиялул ккаши гьарца республикалий бушиву.
«Мюрщисса миллатирттал театрду дунияллул классикалийн хъит тIий бушиву – му театр хьхьичIунмай хъанахъаврил барашиннар. Так миллатрал драматургиялийну театр хьхьичIунмай хьун къабю­хъайссар. Амма Шекспирдул ва Чеховлул пьесарду бихьлайгу миллатрал драматургия якъашайссар,» — увкунни Елена Покорскаял.
Ккавкказуллал ттизаманнул миллатирттал драматургиялул буруккинттая гъалгъа тIий, ванил маслихIат бунни республикалий буллан миллатирттал театрдал режиссертуран ва драматургтурансса семинар-практикум, миннаща цачIу пьесалул проект ххал бигьин бюхъаваншиврул. МаслихIат бунни миллатрал драматургия хьхьичIуннай дансса чаранну ляхълан, жагьилсса драматургтуран кабакьу буллансса грантру ккаккан дуллан.
Фестиваль лакьлакьисса ва муний ххув хьуминнан наградартту дуллалисса шадлугъ хьунни октябрь зурул 5-нний Оьруснал театрдануву.
Фестивальданул гьурттучитал барча буллай, Дагъус­ттан Республикалул, культуралул министр Зарема Буттаевал увкунни:
«Дагъусттаннал аьрщарай Аьрасатнал ва гъанмур дазул кьатIатусса театрал коллективрду цачIун бавтIсса театрал форум хьуссар жува цинявппа цачIун буллалисса магьирлугърал ламуну, цилгу цачIун бавтIсса хIакьсса пишакартал, хIакьсса сахIналул усттартал.
Фестивальданий бивхьусса 15 личIи-личIисса жанрардал спектакллал ккаккан дурунни чIяву миллатру бусса Аьрасатнал ва жула Ккавкказнавасса чIаххурал яргсса мазурдил палит­ра, миллатрал драматургиялул кацI ва аьмну театрал школар­ттал потенциал».
Зарема Буттаевал барчаллагь увкунни фестивальданул сакиншинначитурахь ва жюрилул члентурахь.
Фестивальданий гьуртту хьу­сса театрдал каялувчитуран буллуна ДР-лул культуралул министерствалул чулухасса дипломру.
«ЗахIматну бур кьамул бан ва цIанихсса командалуву жущалва хьхьичIунсса театрал критик, Аьрасатнал магьирлугърал лайкь хьусса ишккакку Гулизар АхIмадовна Султанова бакъашиву. Жюрилуву ванил махъ бикIайва мудангу кIусса ва кьянкьасса. Цув дунияллия лагаврийну лялиян дан захIматсса кьурчIишиву ялун дирссар Да­гъусттаннал театрал магьирлугърал ва щалагу культуралул ккурандалул»,- увкунни Зарема Буттаевал
Фестивальданул гьурттучитал барча бунни жюрилулгу.
«Жу ххал барду ххаллилсса ва гьунар бусса спектакллу», – увкунни Елена Покорскаял.
«Караматсса фестиваль! Дазу дакъасса ххаришиву! ДакIния къалагайсса асарду! Ссавур дакъа ялугьланну 2023 шинал хьунтIисса шамилчинмур фестивальданух», – увкунни Валерий Подгородинскийл.

Лакрал театрданул ва фестивальданий ккаккан бувсса хъуна­сса Шекспирдул пьесалиясса спектакль «Тарс мютIи баву» лайкь хьунни шанна-шанна бахшишран: «Лучший спектакль фестиваля», «За лучшую режиссуру» (режи­ссер Г. Валиев) ва «За лучшую женскуцю роль» (Катаринал роль дургьусса Дагъусттаннал лайкь хьусса артистка Зинаида Чавтараева).