Ухссавнил Ккавкказуллал исламрал хъиривлаявурттал Центрданул цIаниятусса Барчаллагьрал чагъарду буллунни Дагъусттаннал гуманитар институтрал преподавательтуран. Ва институтрал даврин лахъсса кьимат бивщуну бур личIи-личIисса динну дуллалисса ва личIи-личIисса миллатру бусса республикалий дакьаву ядан буллалисса хIарачатрахлу.
П. Рамазанова
Барчаллагьрал чагъарду буллунни ДГИ-рал ректорнан, филологиялул элмурдал кандидат МахIаммад МахIаммадовлун, теологиялул факультетрал деканнал хъиривчу Давуд Тумалаевлун, лингвистикалул ва журналистикалул факультетрал деканнал хъиривчу Усттархан Ибиновлун, кьатIаллил билаятирттащалсса арардалсса буллалисса ректорнал кумагчи ИбрагьимхIажи Аьбдуллаевлун ва пресс-службалий каялувшиву дуллалисса Наталия Раджабован.
Шиккува кIицI лаган, ноябрь зурул 27-нний ялув кIицI лавгсса институтраву, экономикалул сфералувусса экспертъталгу гьурттуну, хьун тIий дур «Аьрасатнал къаршийсса экономикалул санкциярдал» тема ххалдигьлагьисса заседание.
Му заседаниягу хьун тIий дусса дур экономикалул ва кьатIаллил билаятирттал арардал факультетрай хIасул бувсса «Дебаты» клубраву. Дагъусттаннай уттинин дакъасса дур мукунсса проект. «Дебатылул» хъунмур мурад бур студентътуран информациялул анализ дан, куртIну пикри бан ва пасихIну цалва пикри аьч буван лахьхьин баву. ХIакьинусса кьини США-наву, Европанаву, Азиянаву «Дебаты» клубру бусса бур сайки гьарица вузраву. Аьрасатнаву цалчин мукунсса клуб хIасул бувну бур 1998 шинал. Аьмну Аьрасатнал шагьрурдай бусса бур 40 клуб. Дагъусттаннай тIурча хьхьичIва-хьхьичI мукунсса клуб хIасул бувну бур гуманитар институтрал.
