Аьзизсса Гулизардул аьпалун
Барчаллагьрай бура кьадарданийн, дахIалай чинсса тIайлабацIу шаврихлу ттунма, ттула оьрмулуву Гулизар АхIмадовна хьунабавкьуну. Жул дянивсса кIулшивугу ялттурасса дакъассия. Га ттун хъинну мачча хьуна – дазу дакъа хъинсса, аьчухсса, дакI тIайласса дусгу, насихIатчигу. На ганийн чул бищайссия ттула пишакаршиврул ххуллул байбихьулийгу, оьрмулуву агьамсса, хъунисса ва жаваблувсса суаллу биттур бан багьсса чIумалгу.
ЧIярусса шиннардил мутталий ттул ганищал пишакаршиврул ххуллийсса хIалашиву дуссия. Гулизардун Дагъусттаннал ва дунияллул драматургия, халкьуннал творчество ва ниттил маз ххаллилну кIулшиву багьа бакъа дучIи ляркъуссар Лакрал театрдануву архIал зузисса давривугу.
Цинявппа дагъусттаннал театрдан цув бия хъинсса маслихIатчигу, гайннул творчество чялишну машгьур дуллалисса дус-ихтиваргу, тIалавшинна ххисса критикгу.
Оьрмулул ци тагьардануву личIарчагу, ганища бюхъайва цила пишакаршиврул хIуччарду буруччин, ябан. Мунищала архIал ганиву яхьуну дия тIайламунийн вихшала дусса чIиви оьрчIал байнаварсса дакIгу, цийна увксса цума-цаннангу кумаг бансса хIадуршивугу.
Ци журалул даврийн ка лаярчагу, усттарну дайва. Цил щала оьрмулул мяънану хьуну дия пикрилул марцIшиву, ларайсса мяърипат ва цила яхIлийн дакI тIайлашиву.
Вай хасиятирттал ва дакIнивусса гьавасрал къабивтуна га цила бакIрачIан дуркIсса духIан захIматсса къювулул хьхьичI лахIангу. Цивунма цуппа къалавгун, ялунгума хъиннува сахаватлувну, инсантурал хьхьичI аьчухну яхъанай бия. ДакI мяш хьунсса дия ганил арсурваврал оьрчIащалсса рувхIанийсса дахIавугу. Гайннан га бия нинугу, дусгу, насихIатчигу.
ТIювал кIинину Гулизар хьусса Султановхъал ляличIисса кулпатрал феномендалия пикри буллан бивкIукун, дакIнийн багьай Абубакаровлул кучалийсса урчIра зивулийсса къатраву ляличIисса ччаврил гъили бувсса ва караматса гьавасрал инсантал кIункIу буллалисса ужагъ.
Хъамаритан шайссарив хIакьсса романтик, ххаллилсса лас Киров Султановлул, чIирая пандургу ливккун, хIайранну арснал ва душнил оьрчIругу ялугьлагьи бувну, ларг кьинирдая, дяъвилул хIасратрая, миллатрал виричусса тарихрая балай тIий айишайсса чIун. Яла тIурча, Гулизардухьгу маз-кьаз бивхьуну, кIинналагу ккурхIусса хIасратрах къабурувгун, цала асарду буруччин бювхъусса ччаврия балай тIий байбишайссия кIиягу.
Вайннал ужагърайсса ссупралух чара бакъа хIасул шайссия халкьуннал бусаларттал ва балайрдал балгусса мутта, ппухълуннал ссихI, тарихрал чIурду, зунттал щаращал жюржу.
Вайннал ужагърайн цалчин бакIрайн агьманангума бувчIайва ссаятуссарив Султановхъал тIювал гъилишиву, чату нанисса дуссарив рукъацайсса никирттал дахIаву. Яхьувча ва ужагърай ппухълуннал рухI абадул-абадлий, никирая никирайн… Амин!
Бадрижат МахIаммадхIажиева
