![](https://ilchi.info/wp-content/uploads/2021/08/albina.jpg)
ЦIуссалакрал райондалул Н. Мирзоевлул цIанийсса азарханалул хIакин-эпидемиолог МахIаммадова Альбина Заруттиновна бур райондалул жяматрахь ковидрая буруччаву мурадрай вакцинарду баврил агьамшиврия буслай.
«Коронавирусрал инфекциялул азарданул бивщусса шамилчинсса щатIи бур нукIуваминнуяр нигьачIаву дусса. Ва азарданул къашавай хъанай бур мюрщи оьрчIая, жагьилтурая байбивхьуну оьрмулул бугьара хьусса инсантал. Азар цурдагу хъин дуван захIматсса дур. Ялу-ялун хъунна хъанай дур ва азарданул ливтIусса инсантурал сияхI. Уттигъанну жул азарханалий бивкIунни жагьилсса хъамитайпа. Агана, ва хъамитайпалул цил чIумал прививка дурну диркIссания, бюхъайссия укун пашмансса ахир къадучIан. Гьай-гьай, хъама битан къабучIиссар цимур-цаннул бияла хъунасса Заннахь бушиву. Ттул пикрилий, инсантал цалвагу, цалва мачча-гъанминналгу цIуллу-сагъшиву дуруччаврил чулухунмай жаваблувну бивкIссания, хIакьинусса кьини тагьар вакссара оьлуркъусса къадикIанссия. Бала-хатIасса азардануща ххассал хьунсса чаран, так прививкартту давриву, инсантал бусса кIанттурдай маскарду лаххавриву ва медиктурал чулухасса тIалавшиннарду дуруччавривур бусса. ХIакинтурах вичIи дирхьуну, прививкартту даврия жунма хайр бакъа, зарал къахьунтIиссар», – тIий бур хIакин-эпидемиолог Альбина МахIаммадова.