Ухссавнил Ккавкказнавусса хъунама пульмонолог, медициналул элмурдал доктор, ДГМУ- рал кафедралул хъунама Кьубатай Массуев, август зурул ххюнний ивунни Лакрал ва Ккуллал районнайсса азарханардайн, кIийсса санитар-эпидемиологиялул тагьар цукунсса дурив ккакканшиврул.
Ковидрал къашайшалт бусса палатардавухгу увккун, ванал къулагъас дувансса маслихIатру бунни. КIивагу азарханалул медперсоналданун дакIнийн бувтунни республикалий уттигу коронавирусрацIун дархIусса тагьар къулай хъанан дурашиву ва вакцинарду баврил даву сантирай ва лябуккулий дуван багьлай бушиву. «Цуксса хIайпнугу, чан хъанай бакъар пневмониялул ва коронавирусрал азурда буллалими. Азарханарду къашайшалтрал бувцIунува бур, миннаву бур кислород аьркинмигу. Инсантуращал хIала-гьурттуну зун багьлагьисса давурттай зузиминнал прививкарду дуваврийну тагьар ххуй хьун аьркинссар», – увкунни Массуевлул. КIицI лаганну, Дагъусттаннал Минздраврал баян бувшиву, август зурул мяйнний, Дагъусттаннайн цIусса партия вакцинарттал дуркIшиву: 53 400 комплект «Спутник V», 1440 доза «ЭпиВакКорона» ва 15 000 доза «Спутник Лайт». Хъирив кьини вай вакцинарду биян бувссар республикалул медициналул учреждениярттайн ва прививкартту дуллалисса пунктирдайн. Август зурул урчIуннийнин Дагъусттаннай вакцинарду бувну бур 280 903 инсаннал, миннавату 190 650 инсаннал вакциналул кIирагу ятIап дурну дур.
