Ва нюжмардий «Дагестанс­кая правда» кказитрал редакциялий хьунни республикалийсса строительствалул ма­съалартту гьаз буллалисса пресс-конференция.

Ва аралуву цалнияр цал багьри ссайн бувну гьаз хъанай буссарив ва паччахIлугърал дахху-ласулул низамрая бусан шиккун увкIун ия «ГС СКФО» Строительтурал ассоциациялул президент Аьли Шяъбанов, ДР-лул ХIукуматрачIасса капитал строениялул управлениялул хъунаманал хъиривчу Айдамир Исмяилов ва ДР-лул строительствалул министрнал хъиривчу Мурад Аьлиев. ХIакьину ва аралуву хIасул хьусса чIявусса масъалартту кIицI лаглай, Аьли Шяъбановлул бувсуна, республикалул экономикалун ххуйсса мюнпат нани бансса каширду дусса ва ара региондалул хьхьичIмур каялувшиндарал къулагъас дакъа кьариртун, чIявусса застройщикталгу Дагъусттанная чIаххуврайсса цайми регионнайн лавгун, цIана ва аралуву лащинсса тагьар душиву.

«Жул умуд бур Республикалул БакIчинал буржру чIумуйну биттур буллалисса Сергей Меликовлул, строительствалул аралул циняв масъаларттугу ххалбивгьуну, ччясса мутталий жула застройщиктуран шиккура зунсса шартIру хIасул данхьуви тIисса. БакIчинан бувчIин аьркинссар, ва комплексрал масъалартту ца чулийн буккан бувну, дузал къахьурча, республикалул экономикалунгу хъунмасса зарал хъанахъишиву.

Уттигъанну градостроительст­валул ва архитектуралул масъалар­ттан хасъсса ДР-лул БакIчиначIасса Советрал батIаврий Сергей Меликовлул жаваблувсса къуллугъчитурайн амру бувунни тентру дулайни хъунмур къулагъас жуллами строительствалул компаниярттах дуллан», – бувсунни Аьли Шяъбановлул.
Бувсунни ванал цIана республикалул хьхьичI бивхьуну бушиву экономика хьхьичIуннай хъит учин дансса яла агьамми мурадру. «Строительствалул аралуву низам къадурссаксса, республикалул маэшат гьаз бансса цайми чараннах луглагаву хъунмасса гъалатIри», – увкунни ванал.
Дагъусттаннай ялун нанисса 10 шинал мутталий 14,5 млн кв. къатрал дурну, агьалинайн тапшур дан ккаккан дурну дур. Къуллугъчитурал хьхьичI дирхьусса ва тIалавшиндарал хIакъиравугу Аьли Шяъбановлул увкунни, цIанара муниципалитетирттай аьрщив диял къахъанай, агьали авара буллай буна, укунсса журалул тIалавшиннагу анавар буклакисса даву душиву.
Хъирив махъ лахълай, Айдамир Исмяиловлулгу кIицI лавгунни республикалий строительствалул аралуцIун бавхIусса масъалартту, ацIрахъул шиннардий цачIун хъанай, цаннияр ца къабигьасса ва ччанавккусса бушиву.

«Жулла дия жаваблувшиву цуманай дуссарив дурчIин къашайсса, гьарнал цанна ччи-ччикун нани дурсса стройкомплексрал ара. Социал идарартту буллай сукку хьувкун, цIуну дуркIсса хIукуматрал каялувшиндаран багьуна, жулами застройщикталгу кьабивтун, АьФ-лул Хъунмур аьра­ли строительствалул управлениялийн буккан. Ва иширавугу, жул тавакъюрайну, му управлениялул циняр цайнна ларсъсса социал идарарттай зун дурцуссар жула шиччасса строительтурал компанияртту», – бувсунни ванал.
Журналистътурал суаллахьхьун жавабру дуллуну махъ, Аьли Шяъбановлул кIицI бунни вай гьантрай хьусса ДР-лул строительствалул комплекс лябукку буну хьхьичIунмай хъит учин баврин хасъсса батIаврий Сергей МеликовлучIан тIайла дуккан­сса резолюция кьамул дуршиву циняв застройщиктурал цIания, ва аралул масъаларттугу, ми цукун щаллу бантIиссарив бусласисса маслихIатругу хьхьичI ххуттайн лавсун.