КIиазаруннийн бивсса коронавирусрал инфекциялиясса вакцинарду («Гам- КОВИД- Вак») бувкIунни Каспийскаллал поликлиникалийн ( «412 ВГ МО РФ») жула республикалий къуллугъ буллалисса Каспийскаллал флотилиялул аьралитурай прививкартту дан. Прививкартту дан маслихIат буллай бур цинявппагу категориялул аьралитурайн, миннавух хIаписартурайн, контрактрай ва призыврай къуллугъ буллалиминнайн, граждан персоналданийн ва аьралитурал кулпатирттавуминнайн. Прививкартту дуллалиссар хушрай.
ЦIанасса чIумал аьралитурайн прививкартту дуллай бур кIива бригада медициналул зузалтрал. Уттинин прививкартту къадаркьусса ишру къавхьунни. Нюжмардул ахирданийннин прививкартту дан тIий бур 400 инсаннайн.
КIицI лаган, аьралитурансса вакцинарду лавсун бувкIун бур Дагъусттаннайн Кьиблалул федерал округрал аьрали госпиталданул филиаллайхчIин, циняр мюхчан баврил тIалавшиннардугу дурурччуну.
