[dropcap]Я[/dropcap]нварьданул 29-нний Ухссавнил Дагъусттаннай хьунни шадлугърал тагьарданий цIусса ххуллу тIитIлатIисса батIаву. «Астрахань – Кочубей – Кизляр – Махачкала» тIисса цIусса ххуллу хъанахъиссар федерал даражалул трассалул ца бутIа. Р -215 ххуллу «Север-Юг» тIисса халкьуннал дянивсса даражалул ва хъуннасса кашилул трассар.
Ххуллу тIитIлатIисса шадлугърай гьуртту хьунни Къалмукьнал республикалул бакIчи Бату Хасиков, Аьшттарханнал областьрал губернатор Игорь Бабушкин ва Дагъусттаннал ХIукуматрал Председательнал хъиривчу Рамазан Жаппаров.
Ххуллу буллай бивкIми барча буллалисса ва вайннахь барчаллагь тIисса ихтилатраву Бату Хасиковлул кIицI лавгунни цIусса ххуллул шивах ялапар хъанахъисса чIявусса агьалинал, ризкьичитурал мурадру бартбигьинтIишиву ва Къалмукьнал, Дагъусттаннал ва Аьшттарханнал областьрал агьалинал оьрмурду баххана бансса къулайшиннарду гьарза хьунтIишиву.
«Ризкьи-кьинилуха зузиминнангу, хъуни шагьрурдая архну ялапар хъанахъисса шиккусса агьулданунгу трасса тIитIаву хъуннасса байранни. ХIазран бакъархха ххуллурду экономикагу, агьалинал оьрмурдугу къулай баврил ца лишанни куну учайсса», — увкунни ванал.
Рамазан Жаппаровлулгу кIицI лавгунни, цIусса ххуллул цукссагу кутIа буллалишиву ДагъусттаннайхчIин Азирбижаннал дазулучIансса ххуллул манзилгу, мунинсса чIунгу. Ва ххуллу сававну ялунбучIантIимуниву жула дянивсса машлул арарду ялунгу цIакь хьунтIиссар ва жула маэшатрал кутакгу гуж хьунтIиссар. Ххуллул давуртту дарчIуну диркIссар ряхра ятIапрайх. Лахъшиврий бувсса ххуллул лултту бивхьуну бур ризкьичитурал ишла буллансса 10 скотопрогон, мукунма бувну бур МахIачкъала, Грозный ва Аьшттархан бахIлахIисса ххуллу, цуппагу уттинин Къалмукьнал мукьра-ххюра шяравух бивкIсса ххуллул манзил 1,5-ла кутIа бантIисса. Р -125 ххуллу тIайланма бавхIуну буссар «Каспий» Р – 22 ва Дянивмур Аьрасатнавунсса ххуллурдащал.
