![](https://ilchi.info/wp-content/uploads/2021/01/vxdddy5y5.jpg)
Аьлиттаттал арс Нахаев АхIмад
Увссар 1951-кусса шинал ЦIуссалакрал райондалийсса ЦIуссачIурттащиял шяраву. ЦIуссалаккуй школа къуртал бувну махъ зий ивкIун ур токарьну Буйнакскаллал агрегат заводрай. Армиягу лавхъун увкIун махъ увххун ур Дагъусттаннал паччахIлугърал педагогикалул институтравун ва къурталгу бувну бур му ххаллилну (с отличием).
Зий ивкIун ур Буйнакскалий учительну. Муния мукьах кIилчингу увцуну ур армиялийн, кIира шинайсса хIаписарнал къуллугърайн. Зана хьуну ур капитаннал чиндалуву.
1982-ку шинал увчIуну ивкIун ур Ждановлул цIанийсса ЦIуссачIурттащиял совхозирттал парткомрал секретарьну. Муния мукьах: ЦIуссалакрал райондалул КПСС-рал комитетрал пропагандалул ва агитациялул отделданул хъунаману; ЦIуссалакрал райкомрал 2-ма секретарьну; райисполкомрал председательну; райкомрал 1-ма секретарьну; ЦIуссалакрал райондалул бакIчину; ДР-лул Халкьуннал Мажлисрал аппаратрал управлениялул начальникну; МахIачкъалаллал Кировский райондалул бакIчину.
ДР-лул муниципал къуллугърал лайкь хьусса зузала.
1. Цукунсса хьуна оьрчIний вийнма яла гужсса асар биян бувсса зат, иш?
Оьрмулул 54 шинаву ттулла нину ялату лагаву, жу, ххюва оьрчIгу ятинталну кьабивтун. ЧIана-чIаваманан дуссия 10 шин.
2. Цими никирайн дияннинсса кIулли вин вила ппухълуннал нясав? Буси яла архманал цIа.
Жуйн учай Нахаевхъал тухум куну. Ттун ттуна дакIний ур так ттатта Рамазан.
3. Инсаннал хасиятраву винна яла ккарккун къаччимур лишан?
Ттун цукунчIав кьамулну къаикIай кIира лажин дусса инсан, нацIуну гъалгъагу тIий, оьлусса къеллу тIурча, чан дакъасса. Миннаяр нигьачIисса инсантал бакъассар.
4. Вила оьрмулуву яла алши бакъамур шин?
1997 шин. Му шинал авцуну уссия ттул арс. Мура шинал на лавгссияв ЦIуссалакрал райондалул хъунаманал къуллугъраягу.
5. Яла алши бумур шин?
2020 шин. Цуксса захIматсса диркIун духьурчагу, му шинал унни ттун Нахаевхъал фамилия ларсун ачинсса арснал арс – Адам.
6. ВичIара циксса арцу хьукун, дигьаларгун дикIанссия вил дакI?
ТачIавгу арцул чулийнай къанихну къаивкIссара. Ттун мудангу гьа шайва дянивсса щаллушин.
7. Инсаннал тахсирдавасса цумур тахсир хьунссия вища багъишла битан?
Анавар увккун, сситтувух увкусса махъру, дурсса тIул на багъишла дитара, агарда нава кьадар-кьюкьин уллалисса журалийсса дакъахьурча.
8. Бувагу къабитан?
Хаин шаву, кьадарсса къел.
9. Ссан диял къашай вил чIун?
Диял къахъанайнна дикIайва ттула ичIуваминнах аьркинссаксса къулагъас дансса, ттула гъан-маччаминнал чIарав ацIансса чIун. Ми цивппа тIурча, захIматсса чIумал, мудангу ттул чIарав бавцIунмая бикIайсса.
10. Бартлавгун ччисса вила шанма мурад?
Ттул хиял бикIайссия учитель ягу агроном хьунна тIисса. Ми кIивагу мурад ттул оьрмулуву бартлавгунни. Ялагу, чIявуссаннан хиялну бикIай чIивисса ягу хъунмасса звенорал каялувчину хьувияв тIисса. Бартлавгунни ттул оьрмулуву му мурадгу.
11. Вила оьрмулуву хъинну ххирасса кIантту бувгьусса шама инсаннал цIа (нину-ппу къахIисавну)?
Ларгсса шиннардил мутталий ттул чIарав бавцIуссар къачансса инсантал. На мудангу барчаллагьрай уссара каялувчушиврул ххуллий ттунма биялсса затру лахьхьин бувсса, маслихIатирттайну ка-кумаг бувсса, Халидлул арс Айгун МахIаммадовлуйн. Барчаллагьрай уссара МахIаммадал арс Сиражуттин Илиясовлуйн, яла захIматсса чIумал му уссия ттул чIарав. Мукуна щукрулий ура ттунма кьисмат хьуну бивкIун тIий республикалул хъунимину бивкIсса МахIаммадлул арс МахIаммадаьли МахIаммадовлущал ва ХIимматлул арс Муху Аьлиевлущал архIал зунсса.
12.Вина кьамулсса чув-адаминал сурат?
ДакI тIайласса, вихшала дишин бучIисса чув-адамина ушиву.
13.Винма ххуй бизайсса хъамитайпалул сурат?
Я бацIансса, ххаллилсса хъами ххинугу чансса къабикIай. Амма ттун тIурча, яла авурмурнугу, яла ябацIанмурнугу чIалан бикIай ттула оьрмулул дус, ттущал архIал 43 шинал мутталий ялапар хъанахъисса.
14.Агарда бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?
Дагъусттаннай, ЦIуссалакрал райондалий, ЦIуссачIурттахь.
15. Ссаяту бикIай вил яла хъунмур пахру?
На ттула оьрму лайкьну бувтшиврун ккалли бара. Ттула миллатран ттущава ч1ивисса бухьурчагу мюнпат биян бан хьухьунссархха тIийгу икIара. Учин бучIихьунссар мунийн пахругу.
16. Цукунсса дур вил виятурасса къарязишиву?
Ттуятурасса къарязишиву тачIаврагу чанну къадикIай. Бансса затру, бартбигьин ччисса мурадру ялагу ливчIуннихха тIун икIара.
17. Яла ххирамур дукра?
Ххирар жула Дагъусттаннал дукрарду, хаснува лакку гьавккури.
18. Яла къаххирамур дукра?
Муксса ччан къадикIай цIарайх дурсса затру.
19. Ссаятусса бикIай вил яла хъунмамур хIучI?
ХIучIгу чан къашай ялун бучIантIимунил хIакъиравусса.
20.Хьуссарив вил оьрмулуву винна инара ттинин багъишла ритан къахъанахъисса къел?
КъадакIнийн багьлай бур мукун кунмасса зат.
21. Лавгсса заманардавасса цIанихсса инсантуравасса цуманащал хьунаакьин ччива вин?
Иосиф Сталиннущал.
22. Цукунсса бур, вил пикрилий, лакрал миллатрал яла хъунмур буруккин?
Сайки цинявппагу лакрал буруккин бухьунссар тIун икIара цала оьрчIал ва оьрчIал оьрчIал бакIрачIан бучIантIимунил. Жула агьалинал ялун бивмургу, биллалимургу бигьасса бакъар. ХIакьину жунма аьркинни хъиннува цачIун хьун, цаннал чIарав ца бацIан.
23.Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
Гьарца хъанахъимунил ялувсса пикри бикIан аьркинни куртIсса, чантI увкусса. ТачIавгу хъамабитан къабучIиссар жула Дагъусттаннал бушиву бюхттулсса, ччинахь майшан учинсса, тарих. Жува жаваблувссару жула ппухълуннал жуйнма аманат бувсса ххазинарттахлу.