Декабрьданул 9-нний «Дагъусттан» РИА-лий хьунни республикалул жагьилтурал иширттал министрнал буржру чIумуйну биттур буллалисса Камил Сяидовлул брифинг – кутIа пресс-конференция. Мунийсса ихтилатру хьунни коронавирусрал пандемиялул чIумал ДР-лул Жагьилтурал министерствалул дуллай бивкIсса ва цIана дуллалисса давурттаясса.
— Ва шинал апрель зуруя байбивхьуну, жу щиривкIуну зий буру коронавирусрал профилактикалул давурттаха. Жул волонтерталгу бивкIссар ахIвал-хIал кIюламиннан дуки-хIачIия диян дуллай, вай давурттугу дурссар ихIсаниятрал фондирттащал ва ДР-лул ЗахIматрал ва социал хьхьичIуннайшивурттал министерствалущал цачIу. Мукунма хIала бувхссар меценатътал ва ишбажаранчитал. ЦIанасса чIумалгу зий буссар #МыВместе федерал проектрал колл-центр, кумаг аьркинминнал ялув дагъусттанлувтураща оьвчин бюхъайссар «Горячая линиялул» номерданий: 8-800-200-34-11. Республикалул гьарцагу муниципалитетрай буссар волонтертал, кIантту-кIанттурдайсса давуртту цалла кьаралданий най дуссар, — увкуна министрнал.
Мунал ялагу бувсуна цIанасса чIумал республикалий, мунил БакIчинал буржру чIумуйну биттур буллалисса Сергей Меликовлул тапшурлугърайн бувну, жяматийсса патруллу зий бушиву, ми маскарду лаххаврил низам щаллу дуллалаврил ялув бавцIуну бушиву. ДР-лул Минкомсвязьрал чIаравбацIаврийну, октябрьдания шиннай агьалинайх дарчIуну дур 50 азарда маска ва аьркинмур чивчусса 30 азарва буклет.
Камил Сяидовлул чIурчIав дунни волонтертурал-автомобилистътурал даврийгу, бувсунни Республикалул Жагьилтурал министерствалул ва Автомобил спортрал федерациялул цачIуну сакин дурсса волонтертурал-автомобилистътурал суккушиндарая. Вайгу кумаг буллай бивкIссар агьалиначIан дуки-хIачIия диян дуван. Утти вайннал гьурттушиврийну щаллу хъанахъиссар «Довези врача» тIисса акция, мунил лагрулий активистътурал хIакинтуран кумаг буллалиссар къашайшалтрачIан биян.
Цалва ихтилатраву министрнал кIицI лавгуна щалвагу билаятрал лагрулий Дагъусттан волонтертурал дуллалисса даврил чулуха хьхьичIххуттай бушивугу:
— Москавлив пандемиялул чIумал шагьрулул азарханардай зун волонтерталну-медикталну 900 инсан лавгхьурча, Дагъусттаннай 520-нния ливчусса лавгссар. Аьрасатнал Президентнал дуллусса медаллал чулуха Дагъусттан шамилчинмур кIанайри хьусса, анжагъ Москавуллаяр ва Санкт-Петербургуллаяр махъун багьну, — увкуна ванал. Бувсуна шиная шинайн хъуни хьуну най душиву волонтертурал кьюкьри.
Ахирданий министрнал бувсуна уттигъанну тIивтIусса добровольчество хьхьичIуннай даврил региондалул центрданиягу.
