ЦIуссалакрал райондалийсса цинявппагу кIулшивуртту дулаврил идарарттай щалва билаятрай кунма Роспотребнадзорданул ккаккан дурсса цинярдагу тIалавшиннардайн бувну, кьамул бунни дуклаки оьрчIру школарттайн. Гьашину ЦIуссалакрал райондалий дуккаврил шин дайдирхьунни 6397 оьрчIан, миннава 790 – цалчинмур классравун нанисса.
Сентябрь зурул 1-нний ЦIуссалакрал райондалийсса цинявппагу школарттай хьунни КIулшивурттал кьинилун хас дурсса мероприятиярду.
МуницIунма бавхIуну райондалул кьуния шанмагу школалий дирхьунни Щалвагу Аьрасатнаву баян бувну бивкIсса «Помнить – значит знать» тIисса КIулшивурттал кьинилун хас дурсса дарс.
Гьашинусса дуккаврил шин дайдихьлай, Аьрасатнал Федерациялул просвещениялул министерствалул манзилданул режимрай ккаккан дунни Ххувшаврил 75-шинал юбилейран хас дурсса, мура цIанилусса АьФ-лул Президент Владимир Путингу гьуртту хьусса тIиртIу дарс.
Президентнал цалва ихтилатраву дуклаки оьрчIахь барча дунни цIусса дуккаврил шин, чIа увкунни тIайлабацIуртту ва куртIсса кIулшивуртту ласаврихсса гъира-шавкь. Президентнал мукунма оьрчIру тарбия буллалисса нитти-буттангу чIа увкунни цIакьсса цIуллушиву, давриву хьхьичIуннайшивуртту.
Дунияллийх ппив хьусса пандемиялуцIун дархIусса тагьар сававну, гьашинусса дуккаврил шинах оьрчIру мюхтажну ялугьлай бия. Школарттай 1-мур сентябрьданий дуллай аьдатравун дагьсса шадлугъругу дунни гьашину, Роспотребнадзорданул тIалавшиннарду кьянкьану дурурччуну.
Вай мероприятиярдугу дунни так гьашину цалчинмур классравун дуклан нанисса оьрчIан. Лавайми классирттансса линейкартту дунни манзилданул режимрай.