Вай гьантрай МахIачкъалалив хьунни «Цифралул дунияллий терроризмалущалсса талатаву» («Противодействие терроризму в цифровом мире») тIисса элмийсса конференция.
Ва конференциялул лагрулий информатизациялул, дахIаврил ва массовый коммуникациярттал министр Сергей Снегиревлул дагъусттаннал журналистътуран дуллунни «Бандформированияртту ххит дурну 20 шин» тIисса цIанил медальлу та аьратталсса чIумал дяъвилул иширттаятусса тIайласса информация агьалиначIан биян буллай бивкIминнан. Министрнал медаль дуллунни «Илчи» кказитрал хъунама редакторнал хъиривчу Руслан Къардашовлунгу. Наградартту дуллусса журналистътурал кьюкьлуву ва яла лайкьмари учирча, жува къатIайлану къачIалантIиссару. Тани Лакрал райондалул хъунаману зий ивкIсса Ражав Идрисовлул анаварсса мутталий хIасул бувссия ЦIуссаккулув информация агьалиначIан биян буллалисса штаб, «За победу!» тIисса кказитгу итабакьайссия. Лакрал журналистътал Сулайман Мусаев ва Руслан Къардашовгу буссия та штабрай. Дяъвилул цIаравух бувксса журналистъталли кIиягу.
ДакIнийхтуну барча дуллай дуллусса наградагу, ванияргу хъунисса наградартту ласлансса цIуллушиву чIа тIий буру Русланнун. Так дяъвилул иширттацIун къадархIусса наградартту!
