[dropcap]К[/dropcap]Iул бакъа ялун бивсса ва захIматсса ишираву ттуламур дакIнивусса ххаришиву ци дур учирча, кIицI бавияв Аьрасатнал личIи-личIисса шагьрурдайсса азарханардай цIа дурксса хIакинтуращал архIал,

вирттал кунма, зузисса жула Дагъусттаннаясса студентътурая-медиктурая дур куну. Миннавухсса цагу бур вай гьантрай Москавливсса Иноземцевлул цIанийсса 36-мур азарханалий зузисса Мукьардал шяраватусса МахIаммадова Саида МахIаммадлул душ.

---

Залму АьбдурахIманова
Саида, Гъумучиял лицейгу мусил медальданий къуртал бувну, дуклан бувхссар Мос­кавуллал ЦIуллу-сагъшиврул департаментрачIасса ГБУ 7-мур медициналул колледжравун. ЦIана ва дуклай бур 4-мур курсирай хъин бан лахьхьаймур отделениялий. Москавлив азар ппив хъанахъисса ппурттуву Саида ва ванищал дуклаки­сса душру-оьрчIру практикалий бивкIун бур. ЦичIав мюхчан бай костюмругу, маскардугу да­къанна, га чIумал «Анаварсса кумаграй» зий бивкIсса вай, колледжрал каялувчитурал кIира нюжмардийсса карантиндалийн гьан бувну бур. Яларив вай тIайла бувккун бур хIакинтал, медсестрахъул биял къахъанахъисса хъун шагьрулул азарханардайн. Саида ялув кIицI бувсса азарханалий зий бусса бур апрельданул 15-нния шинмай.

— Азарханалийн бувкIсса чIумал жу, къашайшалтрансса корпус хIадур баннин, тIайла бувккунав ччувччусса къашайшалтрал отделениялий зун. Ги­кку бувсса ххюва гьантлул дянивгу жухь коронавирусрал азардания буслай бия, ганищал талан­сса хIадуршинна дуллай бивкIру. Апрельданул 20-нний кIюрххил корпус тIивтIуну, кIира ссятрава нех дирхьуну къашайшалт бувцуну нанисса машинартту кьамул буллан бивкIру. Ттун га чIун гьич къагьан ххива. Щала захIматшиву дия жуйрасса мюхчан бай костюмирттаву, аьдат бакъашиврул, кув гьухъа битлай, кувгу бяхълай, миннуцIун лажиндарайсса бивхьу яругу гьухъа битлай, укол бан хьхьичIсса къашайшалал туннурду ххал къахъанахъийни. Гьарца 6 ссятрава жухь ихтияр дия бигьалаган буккансса «ятIулмур зоналия». МахIатталшиву ци дия учирча, ганиннин цаннащал ца хъярчру-махсартту буллай бакъацIайсса жун гива бувккукун цаннахь ца я учинмур, я бусанмур, я пиш учинсса гъира къабикIайва. Жу, бигьагу лавгун, чIу-чIитIгу къабувну, махъунмай къашайшалтрачIан зана шай­ссияв. Утти жу, вай костюмругу жуйра тIааьнну дикIансса куццуй лагу-лавхьхьуну, давугу канилух дурккун, кьянкьа-кьурчIи хьуру. ХьхьичI гьантрай ххю-ххюя, рях-ряха инсан ивкIусса ишругу хьуна. ЦIанарив тай гьантрай кунмасса бала ба­къар. Та чIумал щаллусса хьхьугу-кьинигу зий бивкIхьурча, утти жухьхьун ихтияр дуллунни 12 ссятрай зун. ЦичIав къаччива цIана ва дунияллий, шаппай ниттичIан ччива, — тIий бур Саида, къашайшалтрачIан бачиннин ттущал ихтилат бан лявкъу­сса базилух.
Апрельданул дязанния шинмай вагу, ванищалсса душругу яхъанай бусса бур гостиницалий.
Саидай, тIайлабацIу ва цIу­ллушиву чIа тIий буру вингу, вищалсса цинявннангу!