[dropcap]М[/dropcap]усиватсса дяъвилий Ххувшаву ларсун 75 шин хъанахъисса гьантрай, цаймигу баласса ишру хьхьичIун багьлай, агьалинаща дакIру ххарину байран дуван къахьун куннасса дур тагьар. Аьрасатнал Президентнал баян бунни Ххувшаврил парадгу махъун рутлатишиву.

Цукунсса тагьар духьурчагу, жулва буржри хIакьину, билаят ххассал буллай, талай бивкIми хIурматрай дакIнийн бивчуну, ливтIуцириннал аьпа учин,

уттаваминнахь (кIиссурттай буккинуксса ливчIун бур фронтовиктал!) цал уттигу барчаллагь учин.

---

ПатIимат Рамазанова
Хъун дакъасса шярава, ЦIу­щаннияту, Буттал кIан­ттул цIанийсса дяъвилийн увцуну ур 128 инсан, миннавату 71 дяъвилул цIарава зана къавхьуну ур. Ватан ххассал дуллай талай бивкIсса вир­ттавравух ур Аьлибуттал арс Маммаев АхIмадгу. Ва аьрайн увцуну ур 1942 шинал, 17 шинал оьр­мулуву, Калининский фронтрая тIайла хьуну, Берлиннайн ияннин­сса аьра­яллил ххуллу бивтун бур. Гьуртту хьуну ур Киев, Бобруйск, Брест, Варшава ва цаймигу шагьрурду душманная мурахас буллалисса талатавурттаву.

— Буттан къаххирая дяъвилия буслан, чIявусса баласса ишру ккавксса мунан дакIнийн бутлан захIматну бикIайхьунссия, — тIий ур АхIмадлул хъунама арс ­Оьмар. — Аьрая ппу зана хьуна Буттал кIанттул дяъвилул 1-мур даражалул ордендалущал ва 9 медальданущал, бур Барчаллагьрал 9 ча­гъаргу, Верховный главнокомандующий Сталиннуясса. Шиккува бусан, буттан ххирая Сталин. Ппу, буниялттунгу, тIайлашиву ччисса, учаймур иттату иттав учайсса, тиха- шихасса гъалгъарду къаччисса ия. Му, ххуймургу къачIалай, гьарзат­райн пяп лачIун дуллалиминнал муттаэ ия.

АхIмад Маммаев дяъвилия зана хьуну махъ зий ивкIун ур тарихрал дарсирдал учительну. Зий ивкIун ур Вихьуллал школалул директорну. Гьамин ванал хIарачатрайну бувну бур Хъювхъиял шяраву школа. Зий ивкIун ур Ккуллал райондалий личIи-личIисса шяраваллаву. Арс ­Оьмар ур, цала уссурссуннал бакIрал ча­гъардай личIи-личIисса шяраваллурду ккаккан дурну дуссар, цума цумур шяраву увссарив, му шяраваллил цIа чичлай тIий.

Вирттал аьрай буни, захIматрал фронтрай чялишну зузиминнал кьюкьлувух бивкIсса Аьйша-Баващал АхIмадлул арулва оьрчI узданну чивун буккан бувну бур, ларайсса кIулшивурттугу ласун бувну. Вайннал оьрчIаву бур элмурдал доктортал, элмурдал кандидат, хIакин, инженер, учитель.
Къизгъинсса дяъвилул цIаравух увксса, аьраличунал ххуллу чувшиврий бивтсса ва тания махъгу Ккуллал райондалул оьрчIан цIакьсса тарбиягу, куртIсса кIул­шивурттугу дуллай оьрму бувтсса ЦIущанниятусса АхIмадлул цамур куццуйсса тарбия дусса оьрчIру бикIангу къабюхъайссия.

Ванал цIа хIакьинусса кьинигу хIурматрай зумух ласайссар агьулданул, ва кIулминнал, ванал тIайлашиврий ва инсаншиврий бувтсса оьрмулул бардулт хьуминнал. Укун кьянкьа- кьурчIисса, сивсусса вирттаврал, яхIлий дяъвилул къювурдугу дурхIуну, жулва никиран ххуйсса оьрму дузал буллай, адаврай оьрму бувтссар. Вайннал чувшиврул ва захIматрал бутIа хIакьинусса кьинилул тарихраву буссар. Жуллами дакIурдивугу буссар.