Дагъусттаннал региондалийсса «Единая Россия» партиялул приемныйлуву апрель зурул 25-ннийгу агьали дистанциялул режимрай кьамул бунни АьФ-лул ПаччахIлугърал Думалул депутат Аьвдулмажид МахIрамовлул.

Имара Саидова
ДепутатначIан ва кьини оьвтIисса агьалинал чIявуми ма­съалартту бия социал кумагирттал, къатрал хьхьичIсса хIаятру шартIирдал дузал даврил ва давурттал щаллу баврил хIакъиравусса.
МахIачкъалалиясса РайхIанат Бабаевал оьвкунни Петр I цIа­нийсса 43 «б» кIичIиравусса къатраву ялапар хъанахъисса агьалинал чулухасса масъалалул хIакъираву. Ванил бувсунни, цалла къатрал хьхьичIсса хIаятравусса асфальт кьакьарду дагьну бушиврийн бувну, оьр­мулул бугьара хьуми бикIу, коляскарттай буцай­сса мюрщи оьрчIру бикIу занази бансса кIантту бакъа ливчIун бушиву. Мукунма ванил бувсунни цала хIаятраву бакъашиву инсантал щябикIансса скамейкартту ва оьрчIру бялахъансса парк. Аьвдулмажид МахIрамовлул махъ буллунни, МахIачкъалаллал администрациялийн аьрза чивчуну, вайннал хIаятрал масъалагу шагьрулувусса къатрал хьхьичIсса хIаятру шартIирдал щаллу дайсса программалийхчIин дузал бан.
Каспийск шагьрулиясса К­мила Аьлиевал бувсунни, хIакьинусса кьини билаятрай хIасул хьусса тагьарданийн бувну, даву дакъа, кIива зуруй ша­ппа щябивкIун бушиврийн бувну, ахIвал-хIал кIюла бувккун бушиву. Депутатнал гава цIана цала кумагчинайн тапшур дунни ва кумагрансса продуктылул ва аьркинмунил щаллу баву.
МахIачкъалалиясса Ахъушинскийл цIанийсса проспектрай­сса чIяру зивурду дусса къатраву ялапар хъанахъисса Лейла Мусаевал оьвкунни вай къатраву цив­ппа мудан щин дакъа азурда хьуну ливчIун бушиву бусан. Ванил бусаврийн бувну, ва масъалалул хIакъираву цимилгу оьвкуну бур къатрал управлениялул компаниялул хъуниминнайн ва миннал цукунчIавсса къулагъас уттинин къадурну дур. МахIрамовлул, шагьрулул жилищный инспекциялул хъунама Аьли Жабраиловлуйн оьвкуну, тIалав бунни ва масъалалул хъирив лаяву ва анаварсса мутталий дузал баву.