Ца-ца миллион арцул буллунни сенатор Сулайман Каримовлул Хъун дяъвилий талай бивкIсса Дагъусттаннал 80-ннийн бивсса ветерантуран ва 500 азарда къурушрансса сертификатру дуллунни блокадниктуран.

Имара Саидова
[dropcap]В[/dropcap]ай гьантрай Хъусращиял шяравасса дяъвилул ветеран Саэд ХIусайнаевлун Каримовлул чулухасса миллион арцун­сса сертификат дулун бувкIунни ДР-лул жагьилтурал политикалул отделданул хъунама Фарман Меликов, МахIачкъала шагьрулул 42-мур школалул директор Тимур Саркаров, «Патриоты» АОО-лул вакил Давуд Атаев.

Хъун дяъвилул ветераннан цахара дурсса аякьа хъинну асар хьуну, дакIнихтунусса барчаллагь увкунни ва чIа увкунни сахаватлувсса дакIнил заллу Сулайман Каримовлун цIакьсса цIуллушиву.
Буттал КIанттул цIанийсса дяъви байбивхьусса цалчин­сса гьантрай хушрай дяъвилийн лавгсса къучагътуравасса ца ур Саэд ХIусайнаевгу. Тай шиннардий вайннал кулпатрава дяъвилийн лавгун бивкIссар Саэдлул уссурвал Рамазан ва Абачарагу. Сивсусса, чIавасса саллатI най унува кьамул увссар пехоталул полкравун пулеметчикну.

[dropcap]С[/dropcap]аэд ва полкраву гьуртту хьуссар Чачаннаву, Ингушнаву, Украиннай ва Молдавиянаву хьусса къизгъинсса талатавур­ттавух. 1944 шинал кIусса щаву дирну, зана хьуссар буттал шяравун. БивкIулул тил дуркIун диркIссар ванал ичIуннай. Хьул-умуд бакъа бивкIсса нину-ппу ва шяраваллил жямат вих къахъанай ливчIссар ва шавай зана ивкIун увкIсса чIумал.

Шиккува кIицI лаган, чIа­вания шинмай музыкалул итххявхсса Саэдлул аьрайн нанийнигу къакьабивтссар цанма ххирасса каманча. Талатавуртту хьхьара хьуну, паракьатсса лахIзарду биривсса чIумал, аьра­ли дустал тяхъа-ххари буллай ивкIссар.
ХIакьинусса кьинигу ветеран хъювуссулну дакIнийн дичлай ур цикссагу вирттаврал оь экьибувтIуну ларсун диркIсса Бюхттулсса Ххувшаврил кьинирду.