![](https://ilchi.info/wp-content/uploads/2020/04/IMG_6723.jpg)
[dropcap]Н[/dropcap]а, угу-увну, хъуна хьуссара Гъумук. Аьралуннаву къуллугъ бувну, зана хьуния шинай зий ура райондалий личIи-личIисса давурттай.
Ва чIумул манзилданий на бара хьура чIярусса шиннардил дянив райондалий хьусса иширттал ва ккаккиярттал. ХьхьичIвами бакIчитуралгу дунни райондалий цан лархьхьусса давуртту. ХIамидлул арс МахIаммадов Юсуп каялувшиву дуллалисса махъсса ацIнияхъайсса шиннардил мутталий дурсса давуртту хьхьичIара тачIав къархьуссар.
Цува ва къуллугърайн учIайхтува, Юсуп чялиш увккуна ЦIахъарату шихунмайсса ххуллийх асфальт бутIаврил ялув. Му мурад чулийн бувккукун, даххана хъанай дайдирхьуна райондалийсса тагьаргу, кьатIушавсса лак гъирарай кIункIу тIун бивкIуна буттахъал минардайн. Цаннил хъирив ца цIу дуклай дайдирхьуна ша-чIу бухлавгун бивкIсса къатри. ЦIу дуклай дайдирхьуна шяраваллал симанну. Бакьин бунни тамансса шяраваллавунсса ххуллурду, цаппарасса шяраваллавун бунни цIусса. Шиная шинайн цIу лаглай дайдирхьунни Лакку кIанттул вирдакI – Гъази-Гъумучиял симан, къулай хьунни агьалинал багьу-бизу, бигьалагаврил шартIру. Шагьрулул куццирайн бувцунни Гьухъаллал махIла, шанма хъунисса чIяву квартирарду бусса къатри бувну. Гъумукун бухлахийни дакI ххари дуллай дур миллатрал Виричу Хан Муртазялил гьайкалданул. Шиккува бувну къуртал шавай бур аьнтIикIасса Къапу-кIаланггу. Хьхьувайсса чаннал пперха тIисса шагьраххуллийх нигьачIаву дакъа занай бур ла-ялавай машинартту. ЦIу буккан буллай бур Гъумучиял парк, шиккува бунни футболданий ва волейболданий буккайсса майданну.
ОьрчIру хьхьувайгума бикIай шикку ттуплий буклай. Эяллайн дурксса къатран кIанттай, дя-Гъумук, ВацIилу зунттуйн лажинну, бунни эмаратсса Жагьилтурал парк, дяхтта лагмасса тIабиаьтрая я батIин къашайсса, хьхьувай тIурча, чаннал пперха тIисса. ПаччахI ххуллийх ла-ялавай нанинал итталун багьлай бур Лакрал ва Ккуллал райондалия бувксса Совет Союзрал дяъвилул ва ЗахIматрал, Аьрасатнал Вирттаврал чIира.
Юсуп МахIаммадовлуща бювхъунни буттал кIанугу, миллатгу ххирасса ишккаккулт цала лагма лаган бан, ми илданий зияратран бишин.
Гьамин, мукунсса чиваркIуннал кабакьаврийну, агьалинан бигьалагаврил шартIругу дузал дурну, эмаратсса куццирайн бувцунни лакрал ца яла тарихийсса гьайкалданун ккаллисса Хъун бяр.
Амма, хIайп, дурмунил кьимат къакIулсса, дурмур лиллалисса инсанталгу жула дянив чан бакъар. Цуксса дакIнил мискинсса икIан аьркинни, шикку бивхьусса скамейкарду, чирахъру гъагълай уклакисса инсан?!
МархлуцIакул даххана хьунни райондалийсса цIуллу-сагъшиву дуруччаврил тагьар. Райондалул азархана цIу буккан баврицIун, дуркIунни ттизаманнул журалийсса медициналул матахI, «Анаварсса кумаграл» машинартту. Зун бувкIунни кьуяхъул жагьилсса пишакартал.
Къурнил чулухунмай бувккукун, дур республикалий чувчIав дакъасса кьяйдалийсса, шанна зивулийсса, виваллил иширттал отделданул къатри. Бувну къуртал шавай бур буллай лахъи лавгсса школа. ЦIусса дуккаврил шинавун нузкьунтту тIитIинсса ниятрай бур райондалул бакI дургьуми.
Агьалинан тирххандарансса иш хьунни Гъумук ттизаманнул журалийсса детсад «Солнышко» баву. Му бакъасса, гьашину республикалий бан ккаккан бувсса детсадирттал сияхIрай бур Гъумук банссагу. Уттинингу тамансса давуртту дурунни школартту, спортзаллу бакьин баврил цIаний. КIира шинал дянив «100 школ» тIисса проектрал лагрулий капитальнайну бакьин бунни мукьва школа.
Щинал кьянатшиву хIисавравун ларсун, проектрал давурттугу дурну, гьашину байбихьлай бур щинаххуллу буллай БахIикIлав, КIямашав, ГьунчIукьатIув, Гъумукун, Къурлату – Лахъирив, Ттурцив, Хъунав, Хъурхъия – Щарав.
Ахиргу, дузрайн буклай бур лакрал агьалинал яла хъунмур хьулбу мурад – газ буцаву. Ларгсса ттуршукулул 80-ку шиннардийва сукку хьуну бивкIсса буруккин – микI-чIикI дуни нигьал ва хьуллил дазуйсса ШавкIрату Щаравсса ххуллугу буллай байбивхьунни, ахиргу, Ухссавнил Ккавкказнаву ттинин бакъасса журалул кIива ламугу бувну, асфальт бакьлакьисса.
Дурцири давуртту цанниха ца хъамаритлай дур. ДакIнийн дичларча, райондалий дурсса чIярусса цаймигу давурттая бусан хьунссар. Чара бакъа кIицI къабувну битан къахьунссар, зунттал районнай банкрал отделенияртту лавкьусса чIумал, Гъумук «Россельхозбанкрал» филиал зунттал районнал дянив так ца Лакрал райондалий зий бусса. Мугу Юсуп МахIаммадовлул хIарачатрацIух хьусса ишри. ХIакьину чIалай бур ванал каялувшиву дуллалисса чIумул манзилданий дурссаксса давуртту уттинин цаягу бакIчинаща дан къархьуну диркIшиву.
На ттула махъ бияйцириннал цIания хъунмасса барчаллагь тIий ура Юсуп ХIамидлул арснахь, райондалул цIа ларай дан, агьалинал ахIвал ххуй бан, райондалул гьарца сфералий хьхьичIуннайшивуртту хьун дан буллалисса хIарачатрахлу. Ттинин цаягу хъунаманал къадурссия вайксса лайкьсса давуртту.
ЦIуллушиву дулуннав вихьхьун вания тихунайгу райондалул къайгъурду щаллу буллан, ккаккияртту хьун дуллан. Кабакьиннав вицIун Заннал, Лакку билаятрал гьунттийсса кьинилул цIаний хьхьичI бивхьусса мурадру дузрайн буккан бан!
ХIусайн
Куччаев