Илияс Шапилов, Республикалул клиникалул 2-мур азарханалул хъунама хIакин:

Ларгсса нюжмар шагьрулул 2-мур РКБ-лун (хьхьичIавасса Ветерантурал госпиталь) хьунни хъинну азурдасса, коронавирус дусса чIявусса къашайшалт ялун бивсса.

ТIайламур бусан, коронавирусращалсса къашайшалтращал нава шагьрулул Анавар кумаграл азарханалий зузисса чIумала хьунаавкьура. Март зурул ахирданий жучIан букIлан бивкIунни пневмониялуха къалархьхьусса, коронавирусрал куннасса лишанну ду­сса захIматсса къашайшалт. Гьай-гьай, жу, мукунсса тагьар хIасул хьунтIишиву кIулну, хьхьичIара хIадур дурну дуссия вай къашайшалтрансса отделение, укунма­сса къашайшалтрайн коронавирус къалахъаву мурадрайну цимурца хIисавравун лавсъсса приемный отделение. На тикку зузи­ссаксса хIаллай кьамул увсса коронавирусрайн щак багьлагьисса 150-хъул къашайшалава 30-ннай му вирус душиву тасттикь хьуна. Ва тагьарданий ттунма яла асар хъана­хъимур му бур – жулва инсантал коронавирус душиврийн вих бакъашиву.
[dropcap]М[/dropcap]уния шинмай, республикалий коронавирусрацIун дархIусса тагьар гужлан хъанан диркIун махъ, ларгсса ххуллункьини ттуйн тапшур бунни РКБ 2-мур азарханалул хъунама хIакиннал бигарду би­ттур буллалаву. Ва азарханалийгу жу най бунува хIадур бувссия коронавирус дусса къашайшалт уттубишин бансса отделение. Ххуллункьинилуя айивхьуну, на кьамул ав пневмония дусса 370 къашайшала.

[dropcap]Р[/dropcap]ентгендалий укунсса къашайшалтрал гьутрурдал цара ца сурат кка­ккан дуллай дур. Коронавирус дусса-дакъасса исват хьуннингу бувчIлай бур пневмония коронавирусрал сукку дурсса душиву.
Ва тагьарданий ттунма яла асар хъанахъимур му бур – жулва инсантал коронавирус душиврийн вих бакъашиву. Цуксса кьурчIинугу, дуркIун дур жучIаннагу ва вирус. ХIакьинусса кьини азарханалийн букIлай бур пневмония дусса щаллу-ккурккисса кулпатру. Коронавирусрал лишаннугу цинявннал ца куццуйсса дакъар. Цаппараннал температура дакъасса, ялун къалирчусса, кIул дан къашайсса дур, цавайнналгу дуки-хIачIиялул тIин къабувчIлачIисса, чурххал ттаркIру цIуцIисса дур, хIасил цанниха ца лархьхьусса вайри чинсса лишанну дакъар.

Тикрал буллайна ура инсантуран ва тагьар хъинну захIматсса душиву бувчIлай бакъашиву. ХIисав бара, ва азарханалийн шанма гьантлул мутталий 370 инсан кьамул уварду коронавирусрайн щак багьлагьисса. Миннава ца хьхьунил дянив жучIан увкIунни 142 инсан. Багьунни хьхьунил ссят 12-нний шаппа щябивкIсса хIакинтал кумагран даврийн буккан бан. Укун анаварсса мутталий чIявусса инсантал къашай шаву жула инсантурал баччи бакъулшиврийнур хьусса. БувчIлай бакъар инсантуран тагьар чIалачIимунияргу оьлуркъусса душиву. Паракьатну бацIлай бакъар, ят буцлай бакъар кувнная кув, буллай бур хъатIив, занай бур бивкIу-буккурдайн. ХIакьинусса кьини Минздраврал сайтрай ва СМИ-рдайхчIин бацIаву дакъа бувчIин буллай, буслайнма бур бурувччуну бикIансса куц.

Уттинин Республикалул анаварсса кумаграл азарханалийн кьамул унни коронавирусращалсса 200-нния ливчусса къашайшалт, утти, зунма чIалачIисса куццуй, байбивхьунни 2-мур РКБ-лийн кьамул буллай.
ХьхьичIва-хьхьичI укунсса къашайшалт кьамул буллай байбивхьуссар ва хIакьинусса кьинигу ми хъин буллай буссар республикалул Инфекциялул азарханалий. Утти яржа бивну бур шагьрулул 1-мур азарханалийнгу, миккугу байбивхьуну бур коронавирусрал къашайшалт кьамул буллай. Ва тагьар хIисавравун ларсун, жу уттигу мукунсса къашайшалт кьамул бансса отделенияртту хIадур дуллай буру.

[dropcap]И[/dropcap]нсантал цалва цивппа къабурувччуссаксса, жува ва ишираща бигьану ххассал къахьунтIиссару. Ва вирусрал 70% лахъайсса дур инсантурал кувннал кувннащалсса дахIавурттайн бувну, мунияту цахъис хIаллай хIарачат бара кувнначIан кув къабухлан, кувнначIа кув къабацIлан. Яла оькки­мургу ва коронавирусрал лархъсса чIун кIул дан къашайшиву, кIирахъул-шаннахъул нюжмардул мутталий мунил лишанну ялун къаличайшиву дур. Инсаннан цайнна ва та лархъссарив ва чув лархъссарив цукунчIав кIул къахьунтIиссар. Мунияту на, хIакин хIисаврай, инсантурахь шаппа бацIияра, цахъис хIаллай ссавур дара тIий ура. ЦIана Да­гъусттаннай коронавирус яла аргъираймур чIун дур. Ва тагьар цуксса хIаллай лахъи лаганссарив хъар хъанахъиссар жула инсантурая.

Коронавирус, рахIму къабувну, лахълай дур мюрщиминнайн ва оьрмулул бугьара хьуминнайн. ХIакьину республикалул азарханарду дузалну бур аьркинсса медикаментирттал.
КIицI лаганна ва ххуллух нава хьунаакьлакьисса агьалинан бувчIин бан аьркинсса масъалагу. Къашайшалт бур аьрзирдай, цан капельницарду къадихьлахьир тIий. Ва вирус дусса къашайшалтран ялунгума капельницарду дишаву бучIи буллай ба­къар. Укунсса къашайшалтран кка­ккан бувсса антибиотикругума, ххалаххив туннурдавун къабувну, таблеткардайхчIин ягу укунма ххалаххи бувну бан аьркинну бур. Вай къашайшалтран капельницарду, так тагьар хъиннура захIмат хьу­сса чIумал дакъа, дишин бучIину бакъар. Цанчирчан туннурдавун рутIлатIисса хьюмушиву най дуну тIий гьутрурдавун.

Яла гьутрурду бурувххуну, ссихI бигьин къахъанай, тагьар хъиннура оьлурккуну, къашайшала инжит хъанай уну тIий. Мунияту ттун ва загу був­чIуну ччива жула инсантуран.
Ттул зухь хъунмасса миннатри, бурувччуну бикIира.
На цал уттигу тикрал буллай ура бакIрайва хIакинтал тIий бивкIсса махъру: «Жу зулшиврий бацIлай буру азарханардай, зугу жулшиврий шаппа бацIияра», — тIий.

Имара
Саидова