ХIакьину, гьарца аралуву инновациялул цIушиннарду ишла дуллалисса заманнай, хъинну аьркин багьлай бур техникалул лахъми кIулшивуртту дусса пишакартал.
ПаччахIлугърал хъуннасса къулагъас дурну бур вай пишакартал хIадур буллалисса вузирдах. Билаятрал маэшатралгу, рынокралгу мяйжаннугусса тагьар кIулсса Дагъусттаннал политехникалул университетрал ректор НурмахIаммад Суракьатов хъуннасса къулагъас дуллай ур цала вузраву хIадур буллалисса студентътурал кIулшивурттал даражалух.
З. АьбдурахIманова
ДГТУ-лул тарих байбивхьуния шинмай, шива жула республикалулгу, билаятралгу чIяру-чIярусса арардаву зий бивкIун бур ва хIакьинугу зий бур гьунар бусса инженертал, строительтал, архитектортал, технологтал ва цаймигу пишакартал.
Университетраву бур личIи-личIисса профиллайх бавчIусса 11 факультет ва Дарбантуллал, Къизлардал ва Каспийскаллал жагьилтал дуклакисса 3 филиал. Шиву кIулшивуртту ларсъсса специалистътал зий буссар Ухссавнил Ккавкказуллал циняргу республикарттай.
ДГТУ тIивтIуния шинмай шива увккун ур 50 азарунниха ливчусса жагьилсса пишакар.
Вузрал кафедрарду тIивтIуну бур республикалул 27 предприятиялий ва элмийсса лабораториярттай. КьутIирду дусса дур чирчуну Москавуллал, Санкт-Петербургуллал ва билаятрал цаймигу вузирдал элмийсса институтирттащал цачIуну зунсса.
ДГТУ-лул цилагу бур элмийсса хъиривлаявурттаха зузисса 5 институт. Гьарца шинах вузрал студентътал лайкь шай Аьрасатнал Президентнал, ДР-лул БакIчинал грантирдан ва стипендиярттан. Университетрая махъ элмулух гъира бусса студентътураща, аспирантуралувун бувххун махъ, бюхълай бур элму ахттар дуллансса ччикунсса журалул каширду ишла дан ва ччясса мутталий цала проектру щурущи дан. Ми проектирдащал вузрал аспирантътал буклай бур Халкьуннал дянивсса личIи-личIисса сий дусса инновациялул фестиваллайн ва ярмукIарттайн.
Мисалдаран, так ца ларгмур шинал личIи-личIисса паччахIлугъирттай хьусса мукунсса фестиваллая вайннал студентътал, аспирантътал 20-нния лирчусса наградарттащал зана хьуну бур.
Университетрал студентътал мукунма гьуртту шай гьарца шинах дувайсса МГТУ-лул, МИФИ-лул, МФТИ-лул олимпиадарттай ва лайкь шай хьхьичIунсса кIанттурдан.
Хъуннасса къулагъас вузрал дувай цала студентътуращалсса тарбиялулмур даврихгу. Студентътал гьуртту шай республикалий дуллалисса чирилул акциярттавух ва чIун-чIумуй бияй бугьараминнансса пансионатирттайн, оьрчIал къатравун ва мушакъатминнансса реабилитациялул идарарттайн.
Вузрал цила бур Каспий хьхьирил зуманив «Политех» тIисса спортрал ва цIуллушиву цIакь дайсса лагерь, бур санаторий-профилакторийгу.
