Барият Султанова, философиялул элмурдал кандидат:
Ссайну дакIний личIайссар ларгсса нюжмар. Бала-апатI хьусса коронавирусрайну. ЧIявусса пикрирду хIасул хъанай бур.
Гьарца ишираву сахаватлувсса тIуллу дусса дагъусттанлувтал кьини дурксса чIумал лахъан хIадурну бакъашиву хъинну асар хьунни. Авазасса тагьар дусса цалчинсса гьантрайва байбивхьуну бия агьали дукиялул луртанну дихьлай.
Инсанталгу бия коронавирусран баруну так лимонну, кIялажавж ва лаччи бацIансса ххай, ми ялун багьну машан ласлай.
Гьай-гьай, кIицI лаганна, жула Президентнал чIун-чIумуй карантин баян бувну, инсантал ва анаварну ппив хьуну нанисса вирусрая мюхчан баврийну, хIакьинусса кьини, цайми хIукуматирттах бурувгун, жулва иш тамансса къулайну бушиву.
Цамур чулуха тIурча, лавкьунни школартту, садикру, инсантурал ччатI лякъайсса кIанттурду. Дакъахьунссар ва тагьар цинявннан къулайссагу. Щавщи бивунни чIиримур ва хъунмур бизнесрал даврийн. Ялу-ялун гьарза хъанай бур давуртту дакъа ливчIсса инсантал.
Ттухьва цIуххирчан, карантиндалуцIун бавхIуну ци дахханашинна хьур куну, на учивияв укун: кьатIату, телефон-телевизордайхчIин баллалисса тIааьн бакъасса хаварду личIаннин, вай махъсса гьантрай, хьхьичIава буттал къатлуву кунма, щалва кулпат ичIува цачIун хьусса чIун дакIний дакъар. Кувннах кувнналсса аякьа ххишала хьунни.
[dropcap]М[/dropcap]ахъсса ппурттуву лахъи лаглай диркIсса ттула докторшиврул даву къуртал дансса чIун ххишаласса хьунни. Кулпатраву оьрчIащал зунсса, ичIаллил кушурду бансса чIунгу диялсса дур.
ЧIалачIиссаксса, дуркIун дур ссавур дан багьлагьисса чIун. ТIабиаьтрангу, чансса хIаллайсса дунугу, дигьалагру дулун аьркинну чIалай бур. Цанчирча махъсса шиннардий щалагу билаятрай гьарза хьуну дур чIяру-чIярусса хъунисса предприятияртту, бацIаву дакъа гьаваллавух лехлахисса самолетру. ХIисав хьунни махъсса гьантрай шагьрулувугума пар-партIисса ссав, марцIсса гьава.
Ссавур дурну, бюхъайссаксса «ИчIува бацIанну». Тарихравун багьантIисса вай ишру къуртал хьуну махъ, Аллагьнал кьудратрайну, умуд бур жула оьрму нигьачIавурттугу чIарах дурккун, хьхьичIава кунма, нирхиравун багьанссар тIисса.
ХIадур бувссар
Имара Саидовал
