«Шаппа-шаппа щябивкIун ци зий буру? Зулми шагьрурдай ци тагьар дур? Халкьру низам дурурччуну бурив-бакъарив?» тIисса суаллахьхьун жавабру дуллунни цайми регионнай ялапар

хъанахъисса ва зий-заназисса жула цаппара лакралгу. ВичIидишинну вайннал жухьва цачIава хъанахъимуния бувс­мунихгу.

---

МахIаммад МахIам­ма­дов, Нижний Новгородрай зий ур хIакин-онкологну:
— На зузисса азарханалий низам хъиннура цIакь хьурча дакъа, цамур цичIав даххана къархьунни цал­сса. Ла­хъай азардал нигьачIишиву ду­сса чIумал, цучIав уххан-уккан къаитлай, мюхчаншиву хъинну цIакь дай­ссар. Хасъсса къуллугъругу, шагьрулул циняв азарханардай ци дурив, цукунсса шартIру дурив ххал дуллай, инвентаризация дуллай бусса бур. ЖучIа кIива азархана хIадур бувну буссар, агарда азар ппив хьуну дачирчангу. Цуппа Нижний Новгородрай тагьар паракьатсса, хIукуматрал къуллугъчитурал тIалав дуллали­­­сса низам дурурччусса дур. Карантиндалул цалчинмур нюжмардий агьали синхралну, ци зунссарив къакIулну, МахIачкъалалив кунма, ттучаннаву гьарзат хъямала дуллай, гьанавиххину бивкIхьурчагу, утти паракьат хьуну, маскардаву ва катIравугу кьатIушав буклай бур. Тай гьантрай кучардай цуя ца инсан ххал къашайва. Шагьрулуву инсан къаливчIсса кунна­сса тагьар дия. Гьар кIанай кунма, жучIагу так дуки-хIачIиялул ттучанну, аптекарду, почта зий бур. Ттун кIулну, цайми регионнаясса, хаснува жула Дагъусттанная­сса, шиккусса вузирдаву дуклакисса жагьилтал ва зурул ахирданийннин шаппа-шаппайн тIайла був­ккунни. МуницIун ххуллурдай, кучардай инсантал бацIан буллалисса ва миннай аькIри дихьлахьисса ишругу ттинин жучIа къахIисав хьунни. Халкьуннайн оьвтIий бур, мурчIи бавцIуну, биччи ба­къашиву къадурну, зула зува бурувччуну бикIира тIий.

Зарема Аьлиева, Тулалий 9-мур азарханалий зузисса хIакин-ЛОР:
— Карантиндалул кIилчинмур нюжмар най дунугу, жул шагьрулий цIана паракьатшиву дур. ЗучIа кунма, машинартту шагьрулувун буххан къабитлатисса ишру ба­къар. Халкь личIлул хьуну, аьркинсса, тIалавсса куццуй къуццу буллай бур. ЧIявуми, давурттайн къазанай, къазразанну бунугу, дакъар хIусутшиву, сси-къащи. БувчIлай бур ва гьарнан чIумуйнусса тагьар душиву. ЖучIан букIлакIисса къашайшалтрал кьюкьарив чIирирагу къархьунни, карантин баян баннингу бучIайва, ттигу букIлайнма бур. Жу, миннатру буллай, мабукIларди, мюхчанну бикIияра тIий бунугу, хъунмурчIин оьрмулул бугьарами бикIай цала азардащал бувкIун. ТIайлассар, маскардаву, катIраву, ккучунну къадурну, арх-архну бавцIуну бикIай. Цалчинмур нюжмар жул шагьрулийгу дия авара­сса, ттюру-гъурулийсса. ЦIанарив пахъдагьру дур. Школарду ва вузру лавкьуну, оьрчIахь ва студентътурахь дистанциялийсса дарсру дихьлантIиссар тIий бур. Та нюжмардий цIакьсса низам диркIнугу, ва нанимур нюжмардий ххуйшиврул салонну ва ялагу цаппара идарартту тIитIинсса ихтияр дуллуну дур. Так гивун ххюннаяр ххишаласса инсантал буххан къабитансса дюъ дирхьуну дур. Халкь цивппагу хъинну личIлулну бур. Паркирдаву ва кучардай нажагьсса акъа инсан ххал къашай.

Маржанат Щамхалова, Краснодардал крайрайсса Рязанская тIисса станицалий учительну зий бур:
— Жул шяравалу дусса райондалий коронавирусрал азар ларсун бувкIун бур тIисса иш ттигу къабавунни. Амма гьар кIанай кунма, жул Белореченский райондалул халкьгу шаппа щябивкIун бур. Шяраву машинартту тинмай-шинмай, аьркиннийн пропускирттащал занансса ихтияр дур. Давурттайн занан аьркинсса хасъсса къуллу­гъирттал пишакарталгу мува куццуй пропускирттайну занай бу­ссар. Шяраваллил кIанттай яхъана­хъисса жуннив цичIав захIматшиву дакъар карантиндалий щябикIан. Жун дансса интту-давуртту багъравугу, ахъувугу чансса дакъар цIана. ОьрчIахь дарсругу интернетрал кумаграйну, архниява дихьлан хIадур хъанай буру. Иш багьсса куццуйри бикIайсса, мунияту цалсса укун зун багьлай бур. Ттуламур даврия бу­сларча, шаппа-шаппа щябивкIнугу, 1-4-ми классирттаву жул школалул дайдирхьуссар Ххувшаву ларсун 75 шин хъанахъисса юбилейрал хьунийн «Дяъвилия жу шеърирдайну бусанну» тIисса поэзиялул акциягу. Ххаришиву дур цала хушрай ванивух гьуртту хьун гъира бу­сса 30 оьрчI рязи хьусса бавнугу.

ХIадур бувссар
Залму АьбдурахIмановал