Дагъусттаннал халкьуннал артистка Лариса ХIажиевал, «Шаппа бацIияра» тIисса акциялий гьуртту хъанай, Фейсбукрайсса цилва блограй Дагъусттаннал агьалинайн вай гьантрай бюхъавай шаппа бацIияра тIисса оьвчаву дунни:
ПатIимат Рамазанова
— Ххирасса дустал, ттул ххирасса дагъусттанлувтал! Жула бакIурдичIан цIана къабигьасса чIунну дуркIун дур. Жулла лагма- ялттусса тагьар мукунсса дурхха, жунма кувннал чIарав кув бацIан аьркинну бур, хъярчирдахун бишинсса цичIав бакъар. Тагьар буниялагу нигьачIисса дур.
ЦIана жунма кьянкьану бацIан аьркинсса, жунма жува ссан бучIисса бурув, цукун яхI буван шайсса, цукун кувннал чIарав кув бацIан шайсса бурув ккаккан бувансса чIун дур. Баласса азарданущал ца хьуну талан аьркинну бур. Жува цану бухьурчанни азардануяр ххув хьун хьунтIиссагу. Бачияра жува шаппа- шаппа бацIаннуча, жулва кулпатрал, ичIаллил къайгъурдалсса булланнуча. Жунма, артистуран, укунмагу шаппа бацIансса чIуннагу къашай. Ва жухьхьунна дуллусса сант ишла дурну, шаппа щябикIанну. Буруччияра зувагу, зунма ххирамигу!
Буккултран дакIнийн бутанну «Шаппа бацIияра» тIисса акция дунияллийцири хIакинтурал дайдирхьушиву. Ваниву гьурттушинна дуллай бур утти чIявусса машгьурсса инсанталгу. Баяннав шаппа бацIан къаччиминнан вайнналми чIурдугу!
