«Оьргърал мусил накьичру»
Укунсса цIанилусса экспозиция тIивтIунни вай гьантрай МахIачкъалалив, Республикалул Халкьуннал творчествалул къатлул хIадур бувну.
Муний тамашачитурал хьхьичIун дуккан дурну дия 40 даву: суратру, лачакру ва цаймигу янна-ка. Выставкалул лагрулий хьунни мусил ххаллай щащаврил мастер-классгу.
Вара выставка хьуссар Москавливгу, ларгсса шинал декабрьданул 2-нния ва шинал январьданул 16-ннийнин.
Каспийскалий кIива цIусса школа бувантIий бур
Каспийскалий ва шинал ахирданийннин цIусса кIива школа бувантIий бур.
Школарду бувантIий бур шагьрулул 10-мур ва 11-мур микрорайоннай, ми бувангу цаннин 436 миллион, вамунин 431 миллион арцул харж хьунтIий бур. Ми арцугу итадакьинтIиссар республикалул ва федерал бюджетирттава. Гьарца школалуща 500 дуклаки оьрчI кьамул уван бюхъантIий бур.
«Хьуссар дяъви»
«Молодая Гвардия ЕР» ДРО-лул прессалул къуллугърал баян бувсса куццуй, Ххувшаврил юбилейран хасну тIиртIуну дур «Хьуссар дяъви» тIисса фотоконкурс. Муний гьуртту хьун оьвтIий бур пишакарсса ва цайнува цивппа хьусса суратрищултрайн. Конкурсрайнсса аьрзри кьамул буллалиссар ва шинал май зурул дайдихьулийннин. Конкурсрайсса гьурттушиндарая гьарта-гьарзану кIул буван бюхъантIиссар ва сайтрай: httр://www.molgvardia.ru.
Ленинград блокадалуща ххассал баврин хасну
Январьданул 27-мур кьини ккалли дувайссар Ленинград фашистътурал блокадалуща щаллуну мурахас бувсса кьинилун. Му кьини жулла республикалул шагьрурдал ва шяраваллал Аьрасатнал халкьуннал аслийсса культуралул центрдай хьунни личIи-личIисса хьунабакьавуртту, батIавуртту, «Блокадалул ччатI» тIисса акциялул лагрулийсса давуртту, выставкарду.
Бадрижамал Аьлиева
