Ссайну дакIний лирчIри вин ларгсса нюжмар?

Укунсса суал ва мунинсса жавабру дулару жу лях-карах жула кказитрай.

Шагьимардан Мудуев, географиялул элмурдал доктор, ДР-лул лайкь хьусса экономист:

— Ларгсса нюжмардий на гьуртту хьура Къумтуркъалаллал райондалий хьусса «Дагестан-Германия» тIисса дунияллул халкьуннал дянивсса бизнес-миссиялул форумрай. Шикку чил билаятирттаясса хъамаллурансса презентация хIисаврай цалла-цалла продукцияртту ккаккан дунни 55-нния лирчусса рес­публикалул предприятиярттал. Ва форумрал ляличIишивугу дия жула республикалий итадакьлакьисса продукция дазул кьатIув машгьур дансса сант душиву. Форумрай гьуртту хьун бувкIсса хъамаллуравух бия Германнавасса, Венгриянавасса, Москавлиясса ва цаймигу регионная­сса вакилтал.

Му бакъассагу, шикку був­ккунни Европанал машлул рынокрайн жула продукция дуккан даву мурадрайсса лекцияртту, бунни элмийсса практикалул докладру ва ихтилатру. КIицI лаган ччай ура вай продукциярттал хIакъиравусса ттулами пикрирду. Зун аьркинну бур Дагъусттаннай итадакьлакьисса продукциялул даража лавай бавриха.

ЧIявуми жула инсантуран, Дагъусттаннайгу, мунил кьатIувгу, хъинну машгьурну дур оьргърал усттартурал кьай-кьуй ва цайми-цаймигу Дагъусттаннал итадакьлакьисса продукцияртту: турт, чай ва м.ц. Вайннул хIакъиравугу, кьимат бивщуну, исват бан багьлай бур ми Аьрасатнаву ва чил билаятирттай цуксса тIалавну дуссарив. ХIасил, жула продукция региондалул кьатIув цуксса тIалавну ду­ссарив кIул буллалисса маркетинг­рал ххал бигьавуртту дан багьлай бур. АПК-лул продукциялун хас бувсса ккуркки столданул даврий миннуха зузиминнаща балжину бусан ва аьч бан къавхьунни цала пикрирду.
Сукку бунни форумрай региондалул кьатIув кьювкьусса багьлуй дикI даххаврил ва жучIара дикI ххира шаврил хIакъиравусса масъалагу.

ХIадур бувссар
Имара Саидовал