Миннувух – Лакрал ва ЦIуссалакрал районнайссаннунгу
ДР-лул КIулшиву дулаврил ва элмулул министерствалул ларгсса шинал республикалул 176 школа воркаут-майданнал щаллу бувну бур. БакIрайва 2019 шинал воркаут-площадкардал
щаллу буван пландалийн лавсун бивкIссар 120 школа. Дурсса экономиялул электрон аукционнайн бувну щаллу буван бювхъуссар ккаккан бувссаннуяр чIявусса.
Бадрижамал Аьлиева
ХIакьинусса кьининин воркаут-майданну буми хIисав булларча, цинявппагу 750 школа хъанай бур.
Ларгсса шинал ялагу Министерствалул итадаркьуну дур 17 школалул (ккаккан бувсса 10-ннин кIанай) спортзал бакьин бувансса арцу. Министерствалул кабакьаврийну давуртту дурну дур, аьмну хIисав бувну, 193 школалий (2018-ку шинал – 174 школа).
ДР-лул КIулшиву дулаврил ва элмулул министерствалийн оьвкуну, кIул бан бювхъунни ларгсса шинал воркаут-майданну дузал бувминнувух бушиву Лакрал ва ЦIуссалакрал районнал цаппарасса школардугу: Лакрал райондалий – Ххюлуссуннал ва Уриннал школарду; ЦIуссалакрал райондалий – Гьамиящиял №2, ЦIуссаккуллал №1, ЦIуссачIурттащиял №1, Чапаеволлал №2 ва Гьамиящиял №1 школартту (мукунма Банаюртуллал ва Барчхойортуллал школарду).
Ва шиналмур сияхIрайн (110 школа – воркаут-майданну бувансса ва 10 школа – спортзаллу бакьин бувансса) лакрал щархъал школарду багьсса-къабагьсса цалсса къакIулли.
Ххюлуссуннал школалул физкультуралул учитель Акаев Сагъир Аьбдулкаримлул арс буслай ур:
— Жу хъинну ххарину буссару укунсса хIаллихшиннардая. Физкультуралул дарсирдай бакъассагу, дарсирдая итабавкьуну махъгу дуклаки оьрчIру воркаут-майдандалийри бусса. Гьарца переменалийгу оьрчIру шиккунни батIайсса. Хъинну дюхъ дусса, хIалусса майдан бур. Ва майдан сакин бувну махъ физкультуралул дарсру дишавривугу ттун хъунмасса кумаг хьунни, — тIий ур Сагъир.
