ХIайп учинсса кIану къавхьуссар

ТIалхIат АьбдурахIманов

[dropcap]Ч[/dropcap]ансса бакъар жула хъунмур никирал дянив эбрат ласун лайкьсса, гьар кьини учирчагу, агьалинан, уттисса жагьи-жугьултран цаятува мюнпат-хайр буну ччисса,

цала чIумуйгу, цIуллу-сагъшиврийгу мяш къавхьуну, жяматийсса иширттавух гьурттушиву дуллалисса хъами-чиваркI. ЦIанасса ихтилатгу жула республикалул хъуншагьрулул Кировский райондалул Хъунисриннал советрал хъунаманал хъиривчуну зузисса ва чIявучин кIулсса, ЧIяйннал шяраватусса АьбдурахIманов ТIалхIат Жавраиллул арснаяр.


Залму АьбдурахIманова
Увну ур ТIалхIат 1936 шинал декабрьданул ахирданий. ЧIивину унува нину-ппугу ялату лавгун, захIматрал ххуллийн ТIалхIат увккун ур 9 шинаву, зий ивкIун ур хъунама уссищал хIухчуну. Колхозрал ризкьи-кьинилухсса чIиви оьрчIал дакIнийсса хиялмур дуккаврицIун, цанма оьрмулул пиша лахьхьинсса гъирарацIун бавхIусса бивкIун бур. Буттал шяраву школагу къуртал бувну, дуклан лавгун ур Аьшттарханнал банкрал учетно-кредитрал техникумравун.

Мунил хъирив къуртал бувну Самараллал машлул институт, бухгалтер-экономистнал пишакаршиву ларсун дур. Ялагу Москавуллал шяраваллил хозяйствалул академиялий къуртал бувну бур шанма зуруйсса курсру. Зий ивкIун ур Ккуллал райондалул шяраваллил хозяйствалул управлениялий, ЦI.Маккаевлул цIанийсса ЧIяйннал колхозраву. МахIачкъалалив ивзун махъ 23 шин дурну дур «Даггазрай» хъунама бухгалтерну зий, Мунияр махъгу, пенсиялийн уккан­нин, зий ивкIун ур «Газпромрай», Рес­публикалул хъуслил фондрай. ТIалхIатлул 15 шин хъанай дур хIалалсса пенсиялийн увккун.

ХIакьинусса кьини жула билаятрайгу, дунияллийгу хъана­хъисса личIи-личIисса иширттая хавар бусса хъуначу жагьилмур никиран ци ккакканавав, вайннал бакIрачIан ци бучIанавав тIий, дакI цIий ур.
ТIалхIат ур 12 оьрчIал оьрчIал ттаттагу. Оьрмулул ххуллий, личIи-личIисса кIанттурдай зий, лайкь хьуну ур ва чIярусса наградарттан. Ттущалсса ихтилатравугу ва кIицI буллай ур, оьр­мулуву цан ххуйсса бакъа халкь къахьунабавкьуссар ва хIайп учинсса кIану цавагу къавхьу­ссар тIий.

Яла лахъмур цаннасса бахшишрангу ТIалхIат ккаллий буллай ур тIайласса ххуллийх нанисса, хъунанал увкумур лаласайсса, чIивинал хIурмат бу­сса ва захIматрал кьимат кIулсса наслу бизаву.
Увсса кьинигу барча дуллай, чIа учин ччай бур ванан цIуллушиву ва каши-кьудрат. Итаннав ина ттигу чIярусса шиннардий вила ххираминнал дянив хIурмат-иззатрай, дус-ихтивартурал дянив кьадру-кьиматрай.