[dropcap]Н[/dropcap]оябрь зурул 27-нний «Дагестан» РИА-лул редакциялий журналистуращал хьунаавкьунни ДР-лул экономикалул министр Султанов ХIажи Русланович.

Министрнал балжину бувсунни уттигъанну Аьрасатнал президент Владмир Путиннул ва Дагъусттаннал БакIчи Владимир Васильевлул хьунабавкьуну дурсса даврил хIасиллая. ХIажи Руслановичлул кIицI лавгунни ва хьунабавкьаврий ссукку бувну бивкIшиву жула региондалун агьамшиву дусса цIурювкьусса масъалартту ва уттинин дурсса хьхьичIуннайшивурттая.

-ХIакьинусса кьини хъинну ялув бавцIуну буссар субъектирдал бакIчитурал даврин кьимат бишлащисса даврил. Региондал хъуниминнал даврин кьимат бищлй буссар цIусса критериярдайн бувну. Хъинну ялув бавцIуну бу­ссар социал-экономикалул кка­ккияртту хьхьичIуннай даврил. Ларгсса шинал жу ларсуссар 625 миллиондалунсса грант.

Нанисса шиналсса ккаккиярттугу чIаланну ххуй хьуссар, мунийн бувну жу вихшала дирхьуну буру республикалул даража лавай баву мурадрайсса грант уттигу ласун, — увкунни ХIажи Руслановичлул.
Пресс-конференциялий сукку бунни госзакупккарттал, дянивмур ва чIиримур бизнесру ххютула ду­ккан даврил, хIукуматрал чулухуннайсса ишбажаранчитурал вихшала цIакь даврил хIакъиравусса масъалартту.

Министрнал мукунма бувсунни республикалул экономикалул ккаккияртту хьхьичIуннай даву мурадрай цикссагу мюнпатсса давуртту дачин дурну бушиву. Бувсунни чIявусса апатIру хъана­хъисса «Кавказ» федерал ххуллу Азирбижаннал дазуйн бияннин цIубуккан бувну, гьарта-гьарза буллалишиву.

Мукунма, ХIажи Руслановичлул кIицI лавгунни зунттал кIанттурдайсса шяраваллал экономикалул ахIвал-хIал къулай баву мурадрай дуллалисса давурттая.
— Гьай-гьай, бувчIлачIисса зат бур социал инфраструктура хьхьарасса кIанттурдай ялапар хьун захIматшиву. Мунияту, итадаркьуну дуссар зунттал щархъавусса инженер объектирдал инфраструктура сакин даву мурадрайсса программартту. Миннувун бухлаххиссар школартту, оьрчIал багъру, медициналул идарартту даву , щинаххуллурду ва цаймигу давуртту.

Гьашинусса шинал Республикалул инвестициярдал программа шамилла хъунна хьунни. ЦIанасса чIумал чялиш дуккан дурну зузи дурну дур республикалул БакIчи Владимир Васильев сиптачи хьу­сса «Мой Дагестан – моя вода», «Мой Дагестан – мои дороги», «Мой Дагестан – Комфортная городская среда» тIисса проектру, — увкунни министрнал.
Ахирданий, ХIажи Руслановичлул дуллунни журналистурал суаллахьхьунсса жабру.