ОьрчIру дуклан аьркинссар ттизаманнул школарттай

«150 школа» проектрал ялув бавцIусса комиссиялул дурсса хIасиллайн бувну гьашину ванивух гьуртту хьуну бур 217 школа.

З. АьбдурахIманова
Ларгмур шинал дурсса хъиривлаявурттайн бувну, школарттай материал-техникалул дузалшинна ци тагьарданий дурив ххал дуллалисса мероприятиярттал лагрулий кIул бан бювхъуну бур ми школарттай дарсирдал чIумал ишла дансса аьркинлугърал тагьар хъинну лащинсса душиву.
Республикалийсса циняв школарттава 15 азаллий 847 дуклаки оьрчI ккалаккисса 131 школа бу­сса бур хъинну нигьачIисса, лекьан хIадурсса тагьарданий ва 546 школа бусса бур капитал ремонтрах мюхтажсса.

Ларгмур шинал кьамул дур­сса «100 школа» проект жула республикалул школарттан дакъа чара бакъасса проект душиву бувчIукун, хIукму хьуссар вания «150 школа» тIисса проект дуван.
Ванил дазурдугу ларгмур шиналнияр гьарта-гьарзассар. ХьхьичIмуниву, мисалдаран, так школа бакьин баву дакъа къадиркIхьурча, гьашину кьамул дурмур проектрайн бувну, бучIиссар, бухмур школа бакьин баврицIун, аьркинну бухьурча, цIусса корпусгу щятува гьаз бан.

Проектрал лагрулий бакьин бувантIисса 217 школалун итадаркьуну дур 591, 3 млн. арцул (миннува республикалул бюджетрава итадаркьуссар 398,9 млн арцул, 129 млн. –меценатътурал ва 63,3 млн. – муниципалитетирттал бюджетирттава).
Шиккува кIицI лаган, цала-цала щархъаву, шагьрурдай школартту бакьин бан арцурду дуллай бусса бур, меценатътурал дакъа, укунмасса, гай школар­ттай тава-тагу дуклай бивкIсса халкьунналгу.
Ва проект жучIара ДР-лул БакIчи В.Васильевлул сипталий щуруй дуссар 2018 шиная шиннай.