Хъювхъиял шяраву
![](http://ilchi.beget.tech/wp-content/uploads/2019/11/hjujyh.jpg)
[dropcap]О[/dropcap]ктябрь зурул 24-нний Хъювхъиял шяраваллил Культуралул къатлуву хьунни бугьараминнал зурул лагрулийсса шяраваллил бугьараминащалсса хьунабакьаву ва гур дагьан дурсса тяхъашиву.
2016-ку шинал Дагъусттаннай баян бувсса Зунттал шинал Хъювхъиял шяраву хьуна янилун дагьансса дахханашивуртту: тIивтIуна оьрчIал багъ, сий дучIан дурну, бакьин бувна Культуралул къатта, цIу дурна Хъун дяъвилий гьуртту хьуминнан дацIан дурсса гьайкал, бувна ламу. Ца шяраву ца шинал мутталий вайксса давурттив даву къачаннихха.
На вай иширттая буслай ура Хъювхъиял шяраваллил Культуралул къатри куннасса къатри цайми шяраваллаву дакъа тIий.
[dropcap]М[/dropcap]инна ми къатрал гьартасса жанахIраву тIивтIуну бия бугьарами барча буллалисса мажлисрал ссупрагу.
Шяраваллил Культуралул къатрал хъунмур Рукьижат Оьмаевал барча бувна мажлисрайн бувкIсса бугьарами. Мукунма барча баврил махъ лавхъуна уттигъанну Хъювхъиял шяраваллил администрациялул каялувчину бувчIусса Асият Аьлиевалгу.
КIицI дан ччива мажлисрай гьуртту хъанай бивкIсса бугьараминнал цIарду: Муса ва СултIанат АхIмадовхъул (балайчи АхIмадов АхIмадлул нину-ппу), Сулайманова Зоя, НикIуева Хамис, ХIусайнов ХIусайна, Загьидиев МахIаммад.
Культуралул даву дачин дурну бия райондалул культуралул зузала Кьурбанов ХIабибуллагь, Ваччиял культуралул къатлул худрук Суллуев Муслим ва Хъювхъиял шяравачу Аздар.
Хъинну ххуйну балайрду увкуна, дикломацияртту дурккуна, къавтIавуртту ккаккан дуруна Хъювхъиял школалул дуклаки оьрчIал. Вайннай каялувшиву дуллай бия учительница Заира Ибрагьимова. Балайрду тIий, къавтIий бия цивппа бугьарамигу. Гьай-гьай, ми барчаллагьрай бия шяраваллил Культуралул къатрал зузалтрайн ва администрациялийн. Тяхъашиву ахттакьуннин лахъи ларгуна. Циняв рязину бия мажлисрая.