[dropcap]О[/dropcap]ктябрь зурул 23-нний Къяннал шяравугу хьунни бугьараминнал зурун хас дурсса тяхъашиву. Му хIасул дурну дия шяраваллил администрациялул ва культуралул зузалтрал.

Къяннал жямат хъинну цала нину-ппу ххирасса, миннал хIурмат бай­сса жямат бур. Тарихраву хьу­сса ишругу вайннал, дакIния гьан къабивтун, ябувай.
2016-ку шинал, Ххувшаврил кьини, вайннал шяраваллил администрациялул хIаятраву дацIан дурссия Хъун дяъвилий гьуртту хьуминнал цIарду чирчусса ххаллилсса гьайкал. Вагу хъанахъиссар ялун нани­сса никирахь дихьлахьисса дарсну. Вагу хъанахъиссар бугьарами дакIния къалагаврил ца тIимуну.

На цал, администрациялул къатраву хьумур мажлисрайн гьаннин, Ссухъиящиял шяравасса Кьурбанов ХIабибуллагьлущал, лавгссияв Къяннал Культуралул къатрал каялувчи Мусаев ХIамзатлучIан шавай. Гикку ХIабибуллагьлул, ХIамзатлул нину Итнай, оьрмулул дус Русина, щарнил бава ПатIимат барча буллай, цаппара балайрдугу увкуна, барча буллалисса махъругу лавхъуна.

Мусаев ХIамзат Шариплул арс Къяннал Культуралул къат­рал хъунаману зий усса ия 1995-ку шиная шинай. Ванал хъинну сий дуну чIюлу бувну бур къат­рал жанахIру. Бур шяраваллил тарихран хас бувсса мурцIурду. Ва цувагу райондалий шайсса циняв фестиваллай, байраннай, шадлугъирттай гьуртту шай. 2015-ку шинал Ххувшаврил кьини балчаннуйгума ия ХIамзат Ваччиял майданнив увкIун. ХIасил, жула лакрал культура кIулсса, га жяматрал хьхьичIун ласун бюхъу бусса культуралул зузала ур.

Муния махъ дакIний личIан­сса батIаву хьуна шяраваллил администрациялул къатраву. Микку тIивтIуну бия авадан­сса ссупра. Шадлугърал тямадашиву дуллай ия цува Мусаев ХIамзат. Даврил иширттай шагьрулийн гьан багьну, шадлугъравух гьуртту хъанай ­акъая Къяннал шяраваллил администрациялул каялувчи Малик ХIажимахIаммадов. Лавхъуна махъру, увкуна ххуй-ххуйсса балайрду ХIабибуллагьлул, Къяннал шяраваллил библиотекалул хъунмур Аьишат Саидовал ва цайминналгу. Улу, къиссу буллалисса душругума бияча.

ЦIуллу баннав зу, чумартсса Къяннал жямат!