Ларгсса нюжмардий Каспийск шагьрулийн хъамалу бувкIунни Нугъайнал паччахIлугърал театр. Му иширацIун дархIусса батIаву хьунни Аьрасатнал халкьуннал аслийсса культуралул центрданий. Шадлугъ дачин дурну бия Центрданул директор Башикар Гадаева.
Бадрижамал Аьлиева
Театрданул художествалул каялувчи, ДР-лул халкьуннал артист Байсултан Жумакаевлул бувсунни 2001-ку шинал тIивтIусса цалва театрданул тарихрая.
Гихунмай театрданул ккаккан бунни цала репертуарданувасса постановкартту ва миниатюрарду, ккаккан дунни нугъайнал халкьуннал хъатIул ва цаймигу аьдатру, багьу-бизу.
ЧIярусса шиннардий Каспийскаллал шагьрулул администрациялул культуралул ва жагьилтурал иширттал управлениялул начальникну бивкIсса, цIанарив 23-мур оьрчIал садикрай каялувшиву дуллалисса Пайзанат Абачараевал барчаллагь увкунни театрданухь, республикалул культуралул оьрмулуву муданнагу дуллалисса хъуннасса гьурттушиндарахлу. Ванил каялувшиндаралусса «Щаращи» тIисса фольклорданул коллективрал, цувгу цIуллу-сагъшиврул ссуссукьусса инсантурая сакин бувсса, ккаккан бунни дагъусттаннал халкьуннал аьдатирттаясса, лаххи-ликкиялиясса сценка.
Театрданухь барчаллагь тIисса махъру лавхъуна шадлугърай хьусса цайми хъамаллуралгу.
Ва аьрххи хьуссар «Театральное куначество» тIисса национал проектрал лагрулий.
