1999 шинал Дагъусттаннал аьрщарайн ххявхсса террористурал кьюкьри ххит дурну 20 шин шаву кIицI ларгунни жула республикалий.
Ва иширацIун бавхIуну, «Илчилий» нани бувну бивкIсса «Вирттаврал аьпа абадссар» тIисса рубрикалий жугу бусарду, террористурайн данди бавцIуну, жанну дуллусса цаппара жула вирттаврая. Тай иширттал гьурттучитурал ва бардултрал бувсмур жу хIарачат банну уттиния тихунмайгу личIан къабитан. ХIакьинусса жул ихтилат Ккуллал шяравасса Марсель МахIмудовлуятур.
Увну ур Марсель 1977 шинал. 1995 шинал лавгун ур аьралуннаву къуллугъ бан. Къуллугъ буллалиссаксса хIаллай цимилагу лайкь хьуну ур подразделениялул ва частьрал командованиялул чулухасса наградарттан. 1997 шинал Марсель зун ивкIун ур ЦIуссалакрал РОВД-лий. 1998 шинал къуллугъ буллан ивкIун ур хасъсса огневой группалул (СОГ) подразделениялуву.
Укун дакIнийн бичлай ур тай дяъвилул гьантри Марсель МахIмудов.
— Сентябрь зурул 4-нний хьхьувай къаралданий бавцIуминная леххаву дуркIуна ЦIуссалакрал РОВД-лул хъунама Муслим Даххаевлуйн, райондалийн боевиктал бувххун най бушиву баян буллалисса. Ванал цинявппа зузалтрайн оьвкуна. ДачIи ссятрава ЦIуссалакрал шяраваллил майдан ва кIичIиртту боевиктурал бувцIуну бия. Миннал позицияртту бия мизитраву ва лахъний дирхьусса къатрал лагмава. Миннал дургьуну дия ратIнил тия чулийсса фермагу. ЦIуссалакрал РОВД-лул къатрал махъсса чIира мичча най бия. Мизитрал къалалий ия снайпер. Мунан кабакьу буллай бия автоматчиктал ва гранатометчиктал.
На кIилчинмур зивулий уссияв, кIичча пулеметрава цIу дирхьуну. Мизитрал къалалий щяивкIсса снайпер жун хъунмасса бахчу буллай ия… Цукун-унугу кIа бат ансса чаран лякъин багьлай бия. Гранатометрава бивтун, ттуща снайпер усса къала лекьан бан бювхъуна.
Боевиктал Липецкаллал ОМОН бусса спортшколалийн, РОВД-лул къатрайн, пучрайн, телеграфрайн, банкрал ва администрациялул къатрайн цIу дирхьуну бия. Муксса гужсса цIу дияхха, лехлахисса ккуллардал токрал ххаллу парча-тика дуллай дия. Ца ппурттуву чIарав пIякь увкусса снарядрал на контузить увнав. Жу захIматсса тагьарданий бияв. Му бувчIлай, ччаннай ацIан хIарачат бав. ЦукунчIав хьхьара дан пайда бакъая. Цания цаннал хьхьарашиву дарча, цинявннал оьрмурдан нигьачIаву ххишаласса дия. Боевиктурал гуж хъунмасса бия. Цахъи ттуйна нава учIайхту, цIунилгу боевиктурайн битлай улувкьура.
Му ппурттуву жул хъунама М. Даххаев спортшколалийсса Липецкаллал ОМОН-лул зузалтран цукун кумаг банссарив пикрилий ия. Му зат бувчIуну, жу кьатIув буккан бансса хIилла дуруна боевиктурал. Кумаг бара тIий миннат буллалисса оьруснал саллатIнал цIания гъалгъа тIун бивкIуна ми, чIурдугу баххана бувну. Амма жун миннал хIилла дурчIуна. Боевиктурахь бия хьхьичIунсса ттизаманнул ярагъ. Цивппагу чIявусса бия. Цала гужирайн мукIруну, нигь-нач дакъа «Да, ОМОН, канийн нанияра!» — тIий, оьвтIий бия.
Амма ОМОН-лул зузалт кьянкьану бавцIуну бия. Ца ппурттуву радиосвязь дургьусса боевиктал жухь тIун бивкIуна: «Жун оьрус аьркинну бур, бувккун, зунма ччинийн насияра. ОМОН ххассал бансса кьаст малахIару».
Хъунамагу жул дакI дуллай ия: «РОВД ласун къашай къалану хьун аьркинссар. ЩиякIуй ва ссаякIуй нигьа мабусару. Жува аранталлу. Жува ххув хьун аьркинссару. Шиччалу къачагътурал бивкIулул дазуну хьун аьркинссар!» — баян бувна кьянкьану Муслим Даххаевлул. Ванал амрулийну, ОМОН-лун ххуллу тIитIин, жу цIу дишарду боевиктурайн.
На кIилчинмур зивулий уссияв, кIичча пулеметрава цIу дирхьуну. Мизитрал къалалий щяивкIсса снайпер жун хъунмасса бахчу буллай ия. Лахъний уну, кIанан жу циняв хъатлий бивхьусса кунма чIалай бияв. КIа цува утаннив бигьану бакъая. Къалалул чIирттал кIа кIучI увну ия, чIавахьулттив тIурча, гьарца чулухунмай тIивтIуну бия. Цукун-унугу кIа бат ансса чаран лякъин багьлай бия. Гранатометрава бивтун, ттуща снайпер усса къала лекьан бан бювхъуна. Му лахIзалий Липецкаллал ОМОН-лул командир Сергей Сковородиннуща жучIан, РОВД-лул къатравун, лихъан бювхъуна. Яла цаппара ссятрал манзилданий гаймигу РОВД-лул къатравун буххан бан бювхъуна. ОМОН-лул зузалтраву щавурду дирссагу бия.
Хьхьувай, ссят ацIра хьусса чIумал, Дагъусттаннал виваллил иширттал министрнал хъиривчу Сергей Оленченкол амру бувкIуна зузалтрал оьрмурду ххассал бан позицияртту кьабитияра тIисса. «Шяраваллил махъсса кIанттурдая боевиктурайн битавуртту дуллай, зу буккан кумаг бантIиссар», — увкуна мунал. Амма, кьабивтун позициярттугу, буккан шайсса тагьар дакъая. Жул хъунаманан ца хIукмулийн учIан захIматну бия. Чапаевкалийгу жул оьрчIру бия: 20 инсан пострайсса, 25 саллатI ва кIива БМП. Цал тайннан баян бан багьлай бия министерствалул амрулул хавар, тайгу буцин багьлай бия жучIанма, РОВД-лул къатравун, яла архIал буклан. Чапаеволия ЦIуссалакрал шяравун нанисса ламу боевиктурал итталу бия. Рациялувух цичIав бусан бюхълай бакъая, боевиктурал радиосвязь дургьуну, гьарзат зия хьун най дия. Бан-бит бакъая.
Му чIумал Даххаевлул амру бувна, БМП-дай щябивкIун, анаварсса скорострай, битавурттугу дацIан къариртун, РОВД-лучIан бачин цивппагу, цанная ца 5 метралул манзилданий. Амрулия бусан тайнначIан тIайла увккуна цал ца, хъирив — ца цамагу зузала. КIюрххицIунмай, цIан-чаннаву, циняв бавтIуна. Документру ва ласун къашайсса ярагъгу бат бувну, РОВД-лул къатрава буккан хIадур хьуру. «Жува ЦIуссаккуллал шяравунмай, Ярык-су неххал чIарах, жуламинначIан бачинссар тIий бикIантIиссар боевиктал», — куну, хIисав-сан дурна Даххаевлул. – Жува ми хъяврин банну. Тия чулий ччучлачисса ххалабакIурдал чанна лахъан бувну бия щала ххуллугу.
Ттуйн тапшур бувна боевиктал хъяврин бансса группа сакин бан.
Жун аьркинну бия, боевиктал жуйнма кIура баен бувну, захIматсса щавурду дирсса оьрчIругу бусса агьаммур группалун буккансса сант рутан. Цамур чаран бакъая. Боевиктал, минометру тIайла бувну, РОВД-лул къатрайн цIу дишин хIадур хьуну бия. Мугьлат бакъа буккан багьлай бия жун. Ахиргу хъунаманал амру бувна позицияртту кьабитан. Мяйя милицанал зузалая хьусса ттул группа ратIницIух ялавай Ярык-су неххачIан бавчуру. Ххуллийх жун хьунаавкьунни ца кьуяксса саллатI, Чапаевкаллал чулуха най. Тайгу жул группалувун хIала бувххунни. Жу ххал хьусса боевиктал, битлай, чялиш бувккунни.
Ттун шяраваллил кIанттурду ххуйну кIулссия. Неххал чIарах бия совет заманнаятува ливчIсса бетондалул бачIи шалкри. Ттун пикри хьунни группа тиккун буцин. Битавурттугу дацIан къаритлай, кьакьалувух жу ЦIуссаккуллал шяраваллил чулийнмай бавчуру. Яла нигьачIаву думур кIанттурдаягу бувккун, неххал зуманийх бавчуру ЦIуссаккуллал ва ЦIуссалакрал шяраваллал дянивсса кьанив буккан. Тикку жулами буссия. Тайннал кумаграцIух боевиктурал ккуллардала лихъан бюхъанссар тIий буру. Амма иш цамур куццуй багьуна. Боевиктал ххай, федералтурал цIу тIиртIуна жуйн. Боевиктуращалсса талатаврицIун жун жуламиннаягу лабикIлан багьуна. Гуж-къиялий рациялувух жу дахIаву дарду штабрал хъунама Амучи Амуттиновлущал, бусарду иш-тагьар. Чансса хIаллава федералтурал битавуртту дарцIуна.
ЧIявусса ккаккарчагу, цинявппа сагъ-саламатну жуламинначIан буккан бювхъуна жуща.
Так 11 гьантта лавгун махъри буккан бувсса ЦIуссалакрал аьрщарая циняв боевиктал. Мунияр махъ тай иширттаву хьусса контузиялулшиврий на агьра госпитальданийн.
Андриана Аьбдуллаева
