[dropcap]Ч[/dropcap]Iярусса шай жул редакциялий кказитрал тарихраву хъунмасса хIаллай дакIний личIансса, миллатрал язи-язими арс-душвавращалсса хьунабакьавуртту.
Ца мукун яргсса ва чIявусса асарду кьабитансса хьунабакьаву хьунни «Илчилий» ларгсса хамискьинигу. Кьадарданул бувцуну, жучIан бувкIун бия Иорданнал аьрщарай ччянива (ХХ ттуршукулул хьхьичIми шиннардий) миналул хьусса, Лакрал райондалийсса ЧIарттал шяравасса Жамалуттинхъал ХIаммад-ХIажинал душ Амал Дагъусттани (Дагестани).
Дагъусттаннайнсса ванил аьрххигу бия Ватанлувтурал форумрацIун бавхIусса.
Чув-унугу чан акъасса лаккучув
Залму АьбдурахIманова
Амал зий бусса бия Иорданнал университетрал медициналул факультетрал деканну. Мукунма ва хъанай бур аьрабнал хIукуматирттай медициналул даража лахъ бавриха зузисса хъуннасса Консалтинграл компаниялул хьхьичIунсса пишакар ва Медициналул департаментрал маслихIатчи. Цила чIумал Иорданнал хIукуматрал бакалавриатрал кIулшивуртту ларсъсса ххюя студентнавух Амалгу тIайла бувккун бивкIун бур США-навун магистратура буккин. Чикаголлал университетгу къуртал бувну, ванил тиккура аьлимчунал даражалул цIагу дурурччуну дур. Амал Дагъусттани бухлахиссар Иорданнал хъаннил, оьрчIал ва кулпатрал ихтиярду дуруччаврил ялув бивтсса хъуннасса жаваблувшиву дусса комиссиялувунгу.
Най буна редакциялул гьарцагу зузалал дакIнил лавсъсса, бакIрал ва чурххал бювхъусса, ккаккан авурсса ва чаннасса симандалущалсса Амаллул ва жул дянивсса ихтилатгу тIааьнсса, цаннах ца мякь бувксса кунма, чIявусса суаллан жавабру дуллалисса ва вания гихунмайгу хьунабакьин хьул-умуд бивхьусса хьуна. ЦIуххинмургу, бусанмургу чансса бакъая.
Хьунабакьаврил гьарцагу лахIза бия тIааьнсса ва тяхъа-пашмансса асардал вибувцIусса. Редакциялийн лакку хъамитайпа, жула ватанлувдуш хъамалу нанисса бавну бувкIсса «Дараччи» хъаннил клубрал хъунмур Гульшан Хасаевалгу хъиннура чIюлу дуруна хьунабакьаву.
Амаллун цуппа чун хъамалу бувкIссарив кIулну бикIан кказитрал хъунама редактор Руслан Башаевлул хьунабакьавугу дайдирхьуна «Илчилул» тарихран хасъсса ва ванил гьану бивзсса Гьарун Саэдовлул оьрмулул ххуллиясса ихтилатрая. Вай гьарзатгу Амаллухь аьраб мазрайн таржума буллай ия ччяния шихунайсса жул кказитрал дус, Сириянаву угу-увну, хъуна хьусса ва жу хьунабакьингу хъуннасса гьурттушиву дурсса Шяпи Ахъушали. Ваная жул кказитрай хьхьичIвагу чивчуссар, ва буккултран кIулссар, МахIачкъалалив вузгу къуртал бувну, кулпатгу бувну, буттал аьрщарай миналул хьусса чуври ва.
— Амал, хъинну ххариссару ина лакку кказитрал редакциялийн бучIаврия. Цукунсса асардащал бувкIра ина Дагъусттаннайн? Ци бусанна ина вила оьрмулия ва гъурбатрай личIан нясив хьусса вила буттая? Ци кIулли вин вила мархрая?
— Барчаллагь хъунмасса! Нагу кIилий ххариссара ттула миллатращал хъиннува гъанну кIул бансса кьасттирай зу ттуйнма хъамалу оьвчаврия. Дагъусттанная, ЧIарттал шяраваллия ттун чIивинийва ттула ппу Жамалуттинхъал ХIаммад-ХIажиная баяйссия. Буттал жухь бусаймур цала нитти-буттаясса, уссур-ссуннаясса, щарнил агьулданиясса, шяраваллиясса бикIайва. Ттул ппу оьрмулул 16 шин хьусса чIумал, цала ниттиуссищал, аьраб мазрайсса кIулшивурттал хъирив Дагъусттанная лавгун, Туркнаву шанна шинай яхъанайгу ивкIун, яла Иорданнавун лавгун ия. Ниттиуссу тIурча, тиккува Туркнаву авцIуну ур. Цаппара хIаллава буттал, Мисрилив лавгун, аьраб мазгу лавхьхьуну, Гьиндусттаннай кIира-шанна шинай Кьуран лахьхьин буллай ивкIун ур. Зана хьуну Мисрилив, къуртал бувну бур Каирдал литературалул университет. Гай шиннардил цумурдив ца ппурттуву, ппу Сириянавугу зий ивкIун ур усру дуллай. Ва лакрал пиша бивкIшиву ттун утти махъри кIул хьуссагу. Буттал чIявуну тикрал байва «Лак кару зузисса, оьтту-ттурчIавухва канил усттаршиврул пагьму нанисса халкьри» тIисса махъру.
ХIасил, дуниявийсса кIулшивуртту ларсъсса ттул ппу увцуну ур зун Иорданнал аьралуннавун ва ганайн тапшур дурну дур разведслужбалул хъунаманал чин. Гиччар дуллусса буттан генералнал чингу. Кьадарданул личIи-личIисса шагьрурдайн, билаятирттайн увтсса жул буттан 12 маз кIулну бикIайва. Цувава литература ккалан ххирасса, чил мазру ччяни лахьхьайсса икIайва. Га ия аьрабнал литературалул магистр. Ганал оьрчIнияссава хиял бивкIун бия аьрабнал литературалуха зунсса. Миналул хьуну, чансса ччаннай авцIусса ттул буттал щарну бувцуну бур хьхьичIва Иорданнавун бивзун бивкIсса Чачаннавасса тухумраясса душ. На бакъасса, ялагу увссар ца арс ва кIива душ. Жу циняв яхъанай буссару Аманнай. Жул уссу ур геолог, ца ссугу ингилис мазрал учительну зий буссар.
Ва ттул Дагъусттаннайнсса кIилчинсса аьрххи хъанай бур. Жул кулпат цалчин Дагъусттаннайн бувкIун бивкIссар ларгмур аьсрулул 70-ку шиннардий. ЦIана кунма бигьану ча шайссия, хъунмасса захIмат хьуссия жун ганий шихун бучIан. ЧIявусса чагъарду, цIухху-бусавуртту, аьрххилул мяъна-мурадраясса хъиривлаявуртту дуруна цалчин нанийни.
Буттал шяраву къакIулли цIана цу ливчIун уссарив. МахIачкъалалив тIурча, буттал кIия уссил наслу ливчIун буссар. Аьщуйн щун бувну, бакъайкьюну цIана гьарная бусан къабюхъанссар. Таний жу ЧIаравгу бувцунав, амма шяраву хъунма хIал къабувну, так лагма бувккун, махъунмай МахIачкъалалив биян бувнав.
БуттачIан шинай кIийлва-шамийлва Ватандалия чагъардугу бучIайва. Мунал ми, гьантта ляхну учирчагу, дахилданува буккангу бувну, цалчин ккаклакисса куна, иттав макьгу дуркIун, бугу-бувккуну, хъинну мугъаятну махъунмай бишайва. Ми цаппара цIана уссичIа яхьуну буссар. УссичIа ялагу яхьуну дикIан аьркинссар ЧIарттал шяраваллил духсса суратругу.
— Иорданнаву лак ялагу бурив? Зу зува кулпатраву ци мазрай гъалгъа тIун бикIайссияв?
— Мукун бур учинсса лак бакъар жучIа тих. Ттунма кIулмигума Туркнавун лавгунни яхъанан. Ца зат кIицI банна шикку. Жу тих лакрайх, яруссаннайх, лазгияйх къабачIайссару. Жу циняв тих дагъусттанлувталлу. Иорданнаву чIявусса бур 19-мур аьсрулийва тихун бивзун бувкIсса чачаннал, къарачай-чаргаснал агьлу. Дянив ишла баймур мазгу жулмур никирал тийх бур аьраб маз. Кулпатраву тIурча, жул ниттил дирхьуну дия низам – чачаннал мазрай гъалгъа тIунсса – жул ичIува ниттилмур бияла ялттусса бия. Ппу къуллугърай уну, жунсса чIун цахъи чанну дуну, жул тарбиялул, ужагърал хIал-ахIвалданул хъунмур хъар ниттихь дия. Мунияту ниттилмур мазрал бияла ялтту бувккуна. ИчIува аьраб мазрай ссихI дуккарча, ниттил жуй арцул аьчIа дишайссия (хъягу-хъяй дакIнийн бутлай бур Амал).
— Виятува ва вила кулпатраягу цахъи гьарта-гьарзану бувсун ччива.
— На каялувшиву дуллалисса факультетрай хIадур байссар аьрабнал хIукуматирттай медициналул аралуву зунсса пишакартал, хъунмурчIин медсестрахъул ва медбратътал. КIицI банна, Иорданнал хIукуматрал каялувчитурал хъуннасса къулагъас мудангу медициналул даражалух диркIшиву, душиву. Аьрабнал хIукуматирттал дянив Иорданнаву итабакьлакьисса дарурттал даражагу лахъссар, медицинагу ца яла лахъмур ххуттай дуссар.
Кулпатрая тIурча, ттул бур кIива оьрчI – арс Султан ва душ Розет. Арс, информатикалул инженергу хьуну, США-наву хъуннасса компаниялий зий ур, душгу, бизнес-управлениялул пишакар хьуну, Аманнай академиялуву дарс дихьлай бур. Душнин цIа дизайни дакIний бур нава дагъусттаннал хъаннил цIардал хъирив бувккун бивкIсса ва жува ми цIарду чирчусса кIунурду бивчусса. Розет тIимур цIа дурккуна душнин дизан (жучIара Равзат духьунссар тIий бивкIру – автор). Вана укунсса хьуссар ттул буттал язи бувгьусса гъурбатрайсса оьрму…
ДакIнихтуну барчаллагьрай бура на зуйн. Ванияр гихунмай на лакку кказитрал дусра!
Жу хаварттай щябивкIун, цаннащал ца жап буллалиссаксса хIаллай, цаннал ца лавсун, муксса цаннан ца ххирагума хьунуккивав. Бачлачийни, иттав макьгу дуркIун, Амаллул жул душру муксса чIуен бувну, ххира бувнахха, ттигу га асар гьан бувар жувату.
Аьжаивсса ишру га кьини цагу-кIивагу бакъая. «Илчилийсса» жул циняр батIавуртту хъамаллуран дакIний личIансса бахшишру дулаврийну къуртал шайссар. Жул бахшишругу – луттирдур. Руслан Башаевлул Лакрал райондалул тарихран хас бувсса лу лавсун, биривсса куццуй тIивтIусса чIумал, най дунура тIайла дарцIуна ЧIартталмур шяраваллия чивчусса лажин, мунияр ххишалагу, гара лажиндарай диркIун дия Амаллул буттал суратгу. Цакуну бахханагу хьуну, «Вана шикку ттул ппу!» — куну, ХIаммад-ХIажи Жамалуттиновлул сурат ккаккан дуруна хъамалудушнил. Яла, цаппара хIаллай виримукьалгу бувцIуну, буттал суратрайх кахгу куну, цихьва цуппа «СсубхIана Аллагь!» тIун бивкIуна. Га ганил ппу ушиву я Р. Башаевлун, я жун кIулну къабивкIссар.
«Илчилийсса» хьунабакьаву къуртал хьуну махъ, Гульшан Хасаевал оьвкуну, Иорданнаясса лакку душ лавгссар «Инт» кафелувунгу – лакку дукрарду ххал дуван, лакку гьавккуригу хIалану.
