Октябрь зуруй Дагъусттаннайн дучIантIиссар захIматсса къашайшалт аьркиннийн биян буллансса кIира санитар вертолёт.
Республикалул санитар авиациялул даву къулай дувансса ва ххарисса хавар баян бувну бур Аьрасатнал Минздраврал санитар авиация гьаз давриха зузисса Михаил Ламзиннул. Ванал бусаврийн бувну, Дагъусттан багьну бур гьашину санитар авиациялул даву ларай дувансса 49 региондалувун, ва программалул лагрулий кIира вертолет Дагъусттаннан дулун ккаккан бувну бур.
Архсса районнаясса къашайшалтран багьайсса кумаг найбунува бувансса даражалийсса вай вертолетирттаву дусса дур реанимациялул оборудованиегу, цимурца аьркинмургу.
«Дагъусттаннал республика транспортрал къулайшинна дакъасса, архсса районну дусса республика духьувкун, кIира вертолет Дагъусттаннал Минздравран аьркин дагьлай душиву хIисавравун ласарду, «Гьаваллал скорая» чара бакъа аьркинссар зунттал районнан»,- увкунни Ламзиннул.
Утти медициналул идарарттал хъуниминнал ва районнал хъуниминнал уртакьну хIадур буван аьркинссар, иш багьни, вертолет ликкавансса кIану: майдан, стадион, хьхьичIва аэродром бивкIсса кIану – ци кIану бухьурчагу, вертолет ликкан, гьаз хьун къулайсса кIану.
