![](http://ilchi.beget.tech/wp-content/uploads/2019/05/tormoz_1.jpg)
«Ванакьай хьуну ттун хъунмасса тIайлабацIу»
[dropcap]Ц[/dropcap]аппара шиннардил хьхьичI Ккуллал райондалий дувайсса ирсирал фестивальданий ттул янилун багьуна чарттая бувсса, СССР-данул вирттавран булайни кунмасса, цIуртти ва орденну. Амма га чIумал ттуща къавхьуну бия гай цIуртти бувманащал ихтилат буван.
Вана уттигъанну, га чIун дакIнийн дагьну, цIуххаву дуллай, кIул ан бювхъунни гай цIуртти бувсса инсан. Га ивкIун ия Ваччиял шяравасса Зайдилавл арс Исяев Ися.
[dropcap]Ш[/dropcap]иккува кIицI бан ччива укунсса затгу. Ттухь чIявуну бикIай таная, ваная макьала чича тIий. Амма на мудан мукун тIиманахь кIицI бара: «Щия-дунугу макьала чичиншиврул чара бакъа, ганал цала оьрмулуву харж ласайсса даву дуллалаву дакъассагу, цамур жяматийсса иширттаву дурсса хьхьичIуннайшивурттугу дикIан аьркинссар», — куну. Ялагу макьала чичлачиманал чулиннай ттунна чара бакъа кIункIу тIаву дикIан багьлай бикIайшивугу.
[dropcap]М[/dropcap]уна мукунсса, ттула дакIнил таргличIан гъансса инсанну лявкъуна ттун Ися. Ванал чичай шеърирдугу, дишай суратругу, чарттая орденну дуваврийнгу учин бучIир скульпторнал даву куну.
![](http://ilchi.beget.tech/wp-content/uploads/2019/05/romb_3-150x150.jpg)
Гьа, ялагу ванал бувайсса бия кIялабарзругу, бакьин байсса бия музыкалул инструментругу.
Ися хъуна хьуну ур Ваччиял шяраву, Зайдилавл ва Аьйшатлул кулпатраву. Ванал ниттия хьуну бур «Нину Виричу», цилгу ацIва оьрчI ччаннай бацIан бувсса – шама арс ва арулва душ. Машаллагь!
Ванакьай ттун хьуну хъунмасса тIайлабацIу!
Исял къатри дия Ваччиял шяраваллил кьабакIраву. КIания кIийннай къатри дакъая. На Ваччату уцингу увкIуна цала «Волга» машиналий. Ва машина цуппагу Исян 60 шин хъанахъисса 2016-ку шинал оьрчIал бахшиш бувну бия. Хъиннихха никирая бивзун укунсса оьрчIругу. Исял ЧIяв къуртал бувну бур ацIва класс. Бувккуну бур Ростовуллал инженертал шайсса институт. Хьуну ур ваная инженер-геодезист. Зий ивкIун ур личIи-личIисса стройкарттай.
![](http://ilchi.beget.tech/wp-content/uploads/2019/05/romb_1-150x150.jpg)
Хьуну ур ваная Ккуллал райондалий цалчинма фермер. Ххяххан дайссия тIива къур, чIикIунтIа, лухIи хъюрув, хъа, нувщи ва цаймигу бакIлахъия. Ва зий ивкIун ур Ккуллал райондалул фермертурал ассоциациялул председателнугу. 2001-2007-ку шиннардий зий ивкIун ур Ваччиял шяраваллил администрациялул хъунаману ва архIалла дуллай ивкIун ур колхозрал председательшивугу.
Га чIумал тIалавшинна диркIун дур шяраваллаву ца инсанни икIан багьлагьисса каялувчину тIисса. Бюхъай ва иш тIайлану бикIан. Ися зий ивкIун ур Грозналийгу, тайннал республикалул бакIчинал резиденция буллалисса стройкалий. Зий ивкIун ур «Ахмад-Арена» буллалисса стройкалийгу. Зий уссияв тIива цала касмулий инженер-геодезистну. Ванан дуллуну дур «Чачан Республикалул лайкь хьусса строитель» тIисса цIагума.
![](http://ilchi.beget.tech/wp-content/uploads/2019/05/romb_2.jpg)
Исял бувсуна цала дакIнил тIалавшинна душиву чарттая медаллу, орденну дуллансса. Ялагу, цачIана хъамалу увкIманал хъазамравун, сурат рищун хьхьичI, чара бакъа лачIайсса бия Виричунал цIуку. Ттуйнгу лавчIуна. БикIанхьуви хъамакъабитулун.
[dropcap]Б[/dropcap]ургиракьай да, жула чIараввасса пагьмурдал инсаннах! Хъамалушин дуллай, ссупралух щябивкIсса чIумал, ялагу ттул хьхьичI ца тIитIала хьуна: Исял цала оьрмулуву пиволул ца бокалвагу кьацIличIан гъан къабувссар тIива. Ттунгу ттунналу дукра нахIу дуван багьуна.
Га кьини ттул дакIния тачIав къагьанссар. На Исял пагьмурдал чIявушиврул хIайран увну ияв. Ваччату Вихьливгу Исял на цала «Волгалий» иян увнав. Амма, га кьини анаварсса иширай гьан ура тIий, ттула ужагърайннив, цамур чIумал учIанна тIий, уххан уван къавхьуна. Нагу лачIунна ганал мукъуцIун.