[dropcap]В[/dropcap]ай гьантрай МахIач­къа­­ла­лийн Хъун дяъвилул шиннардий Севастополь фашистътурацIа марцI бувсса 345-сса битултрал дивизиялун хас бувсса автопробеграл гьурттучитал бивунни.
З. АьбдурахIманова
Автопробеграл манзил байбивхьуссар Дарбантлия. Дусшиврул Къатлул хьхьичIсса майданнив хъамал хьунабакьин ва миннахь ххуллухъин учин увкIун ия ДР-лул жагьилтурал иширттал министр Камил Сяидов, миллатир­ттал иширттал министр Энрик Муслимов, ДР-лул Халкьуннал Мажлисрал депутат Тимур Гусаев, Севастополлайсса жулла республикалул халкьуннал чулухасса вакил Мурат СалихIов ва шагьрулул жагьилтал, студентътал ва укунмасса халкь.

Камил Сяидовлул хъамаллурахь ча бувкIру тIисса цала му­къуву бувсуна, жула поисковикталгу цIана Севастополлай талатавур­тту най диркIсса кIанттурдай жанну харж дурсса, ятIа-тIар бакъа бакъа хьусса аьралийтал ххал буллалисса давурттавух гьурттуну бушиву.

«Укунсса журалул мероприятияртту чара бакъа дуллан багьлагьишиву ялу-ялун бувчIлай бур жунма. Цанчирча хIакьину жула тарих, хаснува Хъун дяъвилуцIун бавхIумур, баххана бан хъит тIисса дунияллул гужру ялун личлай буну тIий. Жула буржри ми гужирдал хьхьичIалу кьукьаву», — увкунни шикку Энрик Муслимовлулгу.